Testament des Priesters Hermann Grone in Muhde.

In nomine Domini. Amen. In jeghenwordicheit my heer Gherdes Schele, eyn prester van der Muden, unde nu tor tyd vorwarer des vorwerckes to Pattekummoncken, unde tughe nabescreven darto ghebeden unde gheropen, de erbere here, her Hermen Grone, prester tor Muden, kranck van lichem, men suenth unde wytlick van synne, in den huse Johannis in de keller to Emeden, anmerkende dat dar nyth sekerer ys dan de doet, men nyth unsekers dan de ure des dodes, wyllen dat men syne schult mane sal to sunte Johannes huse beesten tor der Muden na syne dode, hefft synen leesten willen unde schult bescriven laten in dusse maneer, als na bescreven ys.[*] Item her Johan in Uttermor eyn Davidesgulden lendes gheldes, den ich em lende, do he prester wort, unde 15 Arensgulden vor myne hohe, de ick em vorkoefft hebbe. Item Albert, schomaker to Werd, 5 Arensgulden lendes gheldes [*] Item myn broder Hybe 5 Arensgulden lendes gheldes.[*] Item Mette de veer ys my borghe vor eyn Rin. golden gulden van syner suster weghe. Item Spythorst up den Orde 10 golden Rinsgulden lenden geldes. Item jewelick prester to der Muden sal hebben 1 Rinsgulden, unde ys yt sake, dat eyn juwylick prester wyl leesen 30 missen, so sal hebben juwylick ... Rinsgulden, unde de commelduer sal geven den susteren unde broderen 2 tunnen Hamborghers beres, alz ich doet byn, unde Ghebbeke de weet wal, war dat ghelt ys vor den presteren unde ock vor dat bere. Gheschen in den jare unses Heren M^o CCCC^o XC^o, dominica Oculi, in jeghenwordicheit Johannis in den keller unde Folreck Uffkens, borghers to Emeden, vor tugheslude darto gheropen unde beden. In eyn meer orkunde der warheit heb ick her Gherd vorgescr. myn signet up spacium dusses breves ghedruckket.
a. Item ys em Heyne schuldich 6 Rinsgulden lendes gheldes unde 4 Arensgulden. Item Johan unde Talike in den keller 6 Andreasgulden lendes gheldes.
b. Item[*] Engelke Bomselus (?) to Dyle 8 Rinsgulden vor eyn par ossen, Item Johan to Buerwale, myn sustersone, 6 Rinsgulden, dar steit vor eyn derdendel van eyn acker, dewyle he dat ghelt nyth utghifft, so mach men de garven daroff boren. Item Tideman to Dorpen ys my schuldich 8 Rinsgulden, ende dat sal men strenlick[*] manen van em. Item Amelick Smyet 4 Davidsgulden lenden gheldes.
c. Item Heppe myn brodersone 4 Arensgulden lenden gheldes.

x

x

Archiv	NStA
Bestand	Rep. 1 (Große Urkundensammlung)
Zugangsnummer	R001
Inventarnr.	0826
Jahr	1490
Datumcode	Oculi

x

x

x

Kommentar	Aufgedrücktes Siegel verloren.

x

Editionen	Editie naar dit exemplaar: oub1265.