[in margine: Register fol. 44]
[in margine: die St. Michaelis 1408]
Copia van Noortdijck
in Windsumer zijlvest
ingelaten to wateren.
Wij gemene zijlrechters und gemene
meente van Wyndsumer zijlvest,
doen kundich mith desen openen breve
dat wij hebben verleniget und verle-
nigen mit desen openen breve, den
kerspel to Noortdijcke ende vrijheyt
to enigen dage nae datum 's breves oer
wateren ende vrijen loop t'hebben
in onse gemene wateringe to Windsu-
mer zijle, in aldusdanige vorworden
dat die van Noortdijck sullen maecken
und hebben twe zijlen, die een zijl
sal leggen recht tegen Tawemaer[?]
door den dijck die geheten is de Borch
und soll holden in der wijden i 1/2 gard-
voet und in die hogede i 1/2 gardvoet
und sal strecken toe den sloet die
geheten is Abbemaer und gelegen
is in de zuidzijdt van Emenhuis Azage-
ma, die strect to der waterlose die
daer gaet to Karnyngerzijl, und
die andere zijl sal liggen bij den wech
geheten de Bredewech door den dijck
die Bemarzijndtwende geheten is, to
den slote die geheten is Zuyderwolde-
mer, de rechte streeckt tot Bedera-
zijl, de sal holden in de hoge de i 1/2 gard-
voet, und in de wijde i 1/2 gardvoet, und
op elcke zijle vors. mitten zijle ende
Rode dijcke t'holden, in vorworden dat de
karspellude van Noortdijck sullen hebben
een schot, daertoe elcke zijle doer de Borch
und der Bemerzijdwende elckes jaers
up Sunte Peters dach ad Cathedram
al den somer doer, tot allen Gades Hilligen
toe, und soo sullen de voorgenoemde
schotdoeren also lange gesloten staen
toe, als dat Bedemarzijl und Karmynger-
zijl vorg. opstaen, und wanner men de
schotdore vorg. scheten sal, so sal men des
vermanen de rechter van Noortdijck
vorg. oft den enwordes borge mit
ii richters und en worde de voors. schot-
dore dan uyt geschoten wanneer de
voors. vermaninge geschiet is, so sullen
de buren van Noortdijck voors. breken
alsulcke penen als de zijlrechters brief
van Winzumer zijlvesten inholden
van brokene dijcke, voor't meer sullen
de caspelluden van Noortdijck voors.
holden den Oesterdypps dijck, Sint
Walfridus brugge up toe Wijrckes zuyd-
wende gansch unde dichte in allen we-
gen bij alsulcke pene als de brieven
van Windzumer zijlveste inholden
van broken dijcken, des so mogen de
zijlrechters van Windsumerzijl, de
binnendijckes woonachtich sijn, schou-
wen wanneer hem genoeget und duncket
oerber to wesen, voer't meer Wyderkes
zuudwende van den vors. dieps dijke op, toe
den borch t'holden und mogen de vors.
rechters schouwen elckes jaers van
Sunte Petersdach ad Cathedram op
toe allen Godes Hilligen dage, wanneer
hem des genoeget. Voertmeer sal men
de hemercken meten und wes de mate
draget daer sullen de karspelluden van
Noortdijck nae scieten grasgrasgelijck
und wordt de hemercken voors. neyt
gemeten, so sullen de vors. buiren scieten
voer x^c grase. Item als men wercken
sal toe Wynzumerzijlen elcken wa-
genrede myt twynachtiga mannen,
dat is mit volle warcke, soe sullen de
karspelluden van Noortdijck geven den
zijlvesten vors. vi warckmannen t'hulpe
iii to Bedemer und iii to den Verendell
bij alsulcken pene als men den anderen
werckluden bedet in der zijlvesten.
Item voortmeer sullen die kerspelluden
van Noortdijck holden ii rechters toe
hoeden de warve toe Onderdendamme
und to Bedum de eene und to den Ve-
rendeel de andere, und wanneer de
niewe rechters sweren toe Onderndam
so sullen die ii rechters vors. van Noort-
dijck mede sweren und oeren eenwoordes
borge mede setten toe Underndam,
und de warve mede t'holden und to be-
hoeden de eene rechts myt Bedummers und
de andere myt Verendeel vors. und oeren
eenwordes daermede t'setten und daer-
bij to rechten, so waer die van Noortdijck
broeckachtich in sint und wat men doen
sal in der mene wateringe dat sullen die
karspelluden van Noortdijck mede
doen af't hem boeren mach bij grastale
und weert oick sake dat die ii richters
niet aen en sworen toe Onderndam,
soo sal men richten als men den anderen
rechters toe Wynzumerzijlen plach
to berichten unde oer wateringe sal
bestoppet wesen, al went to der tijt
dat se der rechters und oer eenwordes
borge geset hebben und leten se dat
staen mit goemoede ii jaer lanck
daermede verloren sie de vors. waterin-
ge.
Item waert saecke dat onse water-
pandincge die geheten sint Bemer Zuyd-
wende und de borck die strecken nae
den Woltdijk toe Buerstera Zuyd-
wende voerg. doergegraven worde in
eeniger stede und men die betege je-
nige buiren dye woonachtich weren
to Noortdijcke de solden dat entrech-
ten myt twe noegachtige buren
und solf daermede sweren wat daer ge-
scheen waer, dat hie des rades noch dades
schuldich sij, und weet hije yemant die
dat gedaen heft, dat hie den melden
sal und weer dat dan yechte soo sal
diegene die dat gedaen heeft dat gat
weder maecken, also guet als't te voren
was eerder yechte. Daertoe soe breeckt
hij iiii olde marck tegen den zijlveste
Wyndzumerzijlen voorg. die bynnen den
Woldijck woonachtich sint und so mannich
eedtmael als't daerna loopt, so man-
nich olde marck t'broeck den vors.
sijlvesten. Sunder alle argelist. In oir-
kunde der waerheyt, so hebben wij
etc. cum sigillo domini Heronis, abbatis
in Buren, et domini Mellonis, curati in
Bedum, et aliorum et civitatis Groninge.
Datum anno domini 1408, ipso die
Sancti Michaelis.
Gecollationeert met het zijlvesterboeck,
is accorderende bevonden
M. van Bolhuis, secret.

x

x

Archiv	Groninger Archieven
Bestand	H.A. Nienoord, supplement
Zugangsnummer	627
Inventarnr.	1075
Register Feith	1408.010
Jahr	1408
Datumcode	Michae

x

x

x