Ytheke Aeylkumma, Jarich Meyama, Godeke Hillens en Luido op Hoykingaheem verklaren uitspraak te hebben gedaan in het geschil tussen Freest van Baflo en Eppe Rijpekema over het erf Uppa Mernuma.

Wy Ytheke Aeylkumma Jarich Meyama Godeke Hillensoen ende Luido
op Hoykinga heem doen kundich allen luden ende betugen myt desen apenen
breve dat wy alle schelinge die meyster Ffreest van Baftlo ende Eppe Rijpekema
onder hem ghehad hebben als van erve uppa Marnuma ende van den anderen saken
welke schelinge sie an beyden syden an ons ghebleven synt ende beborghet hebben ende
ghescheyden hebben In aldus daner wijs Dat wy meyster Ffreest voerscr. ende sijnen
erfghenamen toe ghesecht hebben Ayllardesma heem Uppa Mernuma mitten
twen vennen voer den Damme Int zuud ende die twe acker op die oester zijde ende
wester zijde des heems ende die corte ackeren op die noerder zijde des vorscr. heems
ende den camp by der wester zijde des heems ende neghen forling opt norder by den
voerscr. erve myt allen rechten ende eghendoem eweliken ende erfliken toe brueken
ende toe besitten ende horen vryen willen mede toe doen. Ende dyt seggen nemen
meester Ffreest ende Eppe voerscr. an in beyden zijden ende schulden malcanderen quijt van aller scheling die sie onder hem hijr toe ghehad hebben Desse voerscr.
vorwerde synt besloten in der wedmanne antworde toe ryaswert Remmeken
Jullama ende Reuwerdes Bundesma In orkunde der waerheit soe hebbe wy Ytheka
ende Jarich voerscr. onse seghelen an desen brief ghehanghen Daer ons Goedeken
ende Luiden vorscr. toe deser tijt zeer wal an ghenoeget Ghegeven int iaer ons heren
dusent vierhondert ende vijftijn des vrydages voer pinxteren.

x

x

Archiv	Groninger Archieven
Bestand	Kloosterarch.
Zugangsnummer	172
Inventarnr.	20
Fol. Nr.	fol. 012r
Regestnr.	96
Olim	Arch. Klooster Selwerd, inv.nr. 1, reg. 13.
Jahr	1415
Datumcode	VaPentec

x

x

Material	perkament