Bertolt Bunyng, kerkheer van de halve kerk van Sint Maarten te Groningen, en Lubbert Essching, ambtman van Selwerd, verklaren dat Bertolt heeft verkocht aan Lubbert een goed in het zuidoostelijk deel van het buurschap Haren.

Wij Bertolt Bunyng kercheer der halver kerke to sente Meertijn in Groningen ende Lubbert Essching des ghe-
richtes van Zelewert bekennen ende betughen in desen openen breve dat wy eens gheworden synt alsulker vorwerden als
hijr na ghescreven staen. Int eerste dat ik Bertolt voer-screven my ende myne erfghenamen vercoft hebbe Lubberte vorscreven
ende synen erfgenamen stedes erfcopes dat erve ende guet mit den huse ende mit der schure ende mit alle synen tobehoren als dat ghe-
leghen is in dat zuet oeste eende der buerscap van Haren welk erve ick van Aleff van Haren ghecoft hadde ende hebbe
hem mede vercoft den steen den ick daer hadde laten voren. Ende hijrvoer sal ick Lubbert voerscreven of myne erfgena-men her
Bertolde voerscreven off synem erfgenamen weder gheven ende wal betalen sess hundert Groninger guldene vijff ende twintich groninger
guldene myn payments als men nu ter tijt up der stad koer in Groningen groninger gulden plecht te betalen hun-
dert groninger gulden to meydaghe naest comende ende twehundert groninger guldene to sunte Jacob naest comende
te betalen. Hijr synt borghe voer Albert to Broke ende Wigbolt to Haren. Ende drehundert groninger gulden vijff ende
twintich groninger gulden mijn to paeschen daer naest comende te betalen. Ende weert zake dat ick Lubbert voer-screven
off myne erfgenamen heren Bertolde off synen erfgenamen de voerscreven dre hundert guldene vijffende twintich myn dan niet ende betaelden
soe synt vorworden dat her Bertolt ende syne erfgenamen voerscreven daer voer beholden sullen nu den erve ende guede voerscreven alle
jaer soventienden halven groninger gulden payments als voerscreven is tot ener erfpacht ende jaerlix renthe de men
alle jaer eweliken ende erfliken betalen sal als woenlick is erfpacht ende iaerlix renthe in den gherichte van Zelewert
te betalen. Daer is to ghesproken dat Lubbert voerscreven off syne erfgenamen de erfpacht ende jaerlix renthe lossen ende quijtcopen
moghen wanneer sie willen mit drehundert groninger gulden vijffende twintich groninger gulden myn payments
als voerscreven. Alle argelist in desen vorworden uut ghesproken. Hijr hebben an ende over ghewesen her Herman
Schutte kercheer to Haren, her Henric Rynt preester in sunte Meertijns kerke to groningen, Dyrck her Bertoldes
knecht,
Albert to Broke ende Sieleken van Haren. In orkunde hebben wij Bertolt Bunyng ende Lubbert Essching voerscreven onse se-
ghele an desen breeff ghehangen ende omme de merre veste-nisse hebbe wij ghebeden her Herman Schutte kercheer toe
Haren ende her Henryc Rynt preester in sunte Meertijns kerke voerscreven desen breef mit ons te beseghelen. Ende wij Herman
Schutte ende Henric Rynt voerscreven want ons alle dese vorworden voerscreven kundich synt ende wij sie mede hebben helpen dedingen
soe hebben wij onse seghele mede an desen breef ghehangen omme her Bertoldes ende Lubberts voerscreven bede willen. Ghegeven
in d.. ..er onss heren dusent vierhundert ende achtiene den dinxedaghes to paeschen.

x

x

Archiv	Groninger Archieven
Bestand	Kloosterarch.
Zugangsnummer	172
Inventarnr.	435
Regestnr.	104
Olim	Arch. Klooster Essen, inv.nr. 4, reg. 18. Reg. Feith 1418.9.
Jahr	1418
Datumcode	MpPasche

x

x

Kommentar	Met de zegels van Bertolt, Lubbert, Herman Schutte, pastoor te Haren, en van Hendric Rijnt, priester van de Martinikerk

x

Material	perkament