Reynolt Hughing schenkt aan zijn dochters Stijne en Hille, zusters van het Olde Convent, ten behoeve van de zusters aldaar, drie huizen met erf in de Rode Weeshuisstraat ('Hardewikerstrate'), waarmee Stijne en Hille uitgeboedeld zijn.

Ick Reynolt Hughing bekenne ende tughe mit dessen openen breve voer my ende myne erffgenamen dat
ick mit gueden berade ende vryen willen hebbe ghegeven voertijdes ende noch gheve Stinen ende Hillen
mynen kinderen ende zusteren des olden convents in Groningen to behoeff den ghemenen zusteren aldaer tot
ewighen tijden to bruken ende oeren vryen willen daer mede to doen de dre kameren mitten erve daer sie
uppe staen ghelegen in Hardewiker strate up dat noert eende van mijnre schure ende strecket sich westwert
an Folkeer Maurissinge schure Ende wanneer de zusteren off yemant van oerre weghen de voerscr. kameren
willen vertymmeren soe moghen sie tymmeren an de noertsyde ende up dat oester eende als dat tymmer nu ter
tijt staet ende moghen zuetwert an myne schure tymmeren dat de wester eende also wijt sij als Folkeers
voerscr. stenen schure ende de oester eende een halven steen engher ende dan soe moghen sie ene wate-
ringe hebben tusschen myne schure ende den voerscr. kameren Ende hijr mede soe hebben Styne ende Hille
voerscr. my quijt geschulden van aller erfnisse ende alsodane ansprake als sie up my hebben mochten
voer datum des breefs In orkunde soe heb ick Reynolt voerscr. mijn seghel an dessen breef ghehangen
Ende hebbe ghebeden Johanne ende Thesen mynen zoenen desen breef mede to beseghelen dat wy Johan
ende These voerscr. ghedaen hebben ende hebben omme bede willen onses vaders voerscr. onse seghele
mede an desen breef ghehangen Inden jaer onss heren dusent vierhundert twe ende dertich up sunte Mathias avent.

x

x

Archiv	Groninger Archieven
Bestand	Kloosterarch.
Zugangsnummer	172
Inventarnr.	339
Regestnr.	146
Olim	Arch. Olde Convent, inv.nr. 18, reg. 9. Reg. Feith 1432.10.
Jahr	1432
Datumcode	vMatthi

x

x

Kommentar	Met de zegels van Reynolt Hughing, en van Johannes en These, zoons van Reynolt

x

Material	perkament