Commandeur Thiard en de commanderij en de voorwerken van Wijtwerd sluiten een overeenkomst met zuster Tetteke, waarbij Tetteke aan het klooster overdraagt al hetgeen haar man Tadeko haar heeft nagelaten, tegen een lijfrente van 8 Arnhemse guldens.

Wy her Thiard Commendur ende meyne amptis ende conventis liude in den convente ende vorwerken tho Wytwerth
doen kundich allen liuden de dessen breeff lezen off hoeren lezen Dat wij myth der eerbaeren vrowen Tetteken
unser methe ynprovende suster in unsen convente tho Wytwerth vorsc. in aldus daen maner ende vorworden wytlike ende
wel voerdraghin zin In dat eerste dat Tetteken vorsc. alle de hure off rente myth den erve Dat Tadeko hoer
echte man ende unse methe ynprovende broeder den ghod ghenaedich zy nae laetin hevet Al waer dat leghin is
Hefft over ghevin ende gyfft over ghode ende Sunte Johannes ende den convente tho Wytwerth vry ende verdich ewlike
ende erfflike tho setten tho vorkopen tho vorwisselen ende allen hoeren vryen wyllen daer methe tho doen Ende
wy conventis liude vorsc. bykennen uns schuldich Tetteken vorsc. tho bytalen voer desse hure off rente vorsc.
alle jaer by Sunte Peters daghe Katedrum achte arnimske gulden so langhe so se levet Ende dessen vorsc. summa
ende jaerlikis rente nae her live nyet tho erven up hoer erffghenaemen ende naekomillinghe men up den vorsc.
ment Voer dessin summa wal tho bytalen hebben wy commendur ende conventis liude settid Tetteken tho eyne pande
zo langhe zo ze levet ende here vrenden niet an tho erven ene fenna landis de ghenaemed is de Thyald-
hirne ende eyn andere fenne de gheheten is Ebbama camp In aldus daen vorworden Ist zake dat unse conventis
liude Tetteken dessen vorsc. vorword nycht holde zo mach ze dit vorsc. lant buta aller leye tyeghinsprekin
vry ende verdich tho hure gheven zo langh al hwen se dessen summa ful ende al furhaled hefft ende nyet lengher
daen salt echtis de convent bruken Tho desse vorworden ende puncten vorsc. hebben wy Tetteke ende commendur
ende meyne conventis liude vorsc. van beyde zyden fullen consent gheven Inder tyeghenwardichheyd der Erbae-
ren ende wysen liuden als her Abekens ende her Aylikens Cur. tho Uuthusum ende Usquerth, Haykans ende Benans
wedmans tho Usquerth vorsc. Ende Remkans Dedama wedmans wysa tho gheropin ende bedin broder Ubba
broder Remmeko broder Sicko ende anders vele ghoder liude tho gheroepin ende bedin van beyde zyden desse waer-
heyd tho bytughen off des noed is. Ende wy Tetteke ende commendur ende meye conventis liude vorsc. hebben ghebedin
van beyde partin de Erlike prestirs ende Cur. vorsc. als her Abeken ende her Ayliken umbe bettere byvastnisse
ende tiuchnisse dessin breeff methe tho by Segill. Ende wy her Abeko ende her Ayliko vorsc. umbe bethe wille
van beyde zyden hebben dessen breff myth den convente by Segill. Dissen breve zintir twe van worde tho
worde al lyke ghescr. ende by Segill. dat eyne \{dat eyne\}\ hevet Tetteke untfangh ende dat andir
de convent vorsc. Ghescr. int jaer uns herens Mo CCCCo ende vyff ende dertich des saterdagis nae
unser vrwen daghe concepcio.

x

x

Archiv	Groninger Archieven
Bestand	Kloosterarch.
Zugangsnummer	172
Inventarnr.	275
Regestnr.	163
Olim	Arch. Klooster Wijtwerd, inv.nr. 5, reg. 59. Reg. Feith 1435.18.
Jahr	1435
Datumcode	SpConMar

x

x

Kommentar	Met de zegels van het convent, Abeko, pastoor te Uithuizen en Ayliko, pastoor te Usqert

x

Material	perkament