Bernd van Schedelich, balijer van Westfalen, commandeur van Steinfurt en meester van Oostfriesland, verklaart dat de commanderij te Oosterwijtwerd wordt geïncorporeerd bij de commanderij te Oosterwierum.

Wij Broder Bernd van Schedelich Balijer upp Westphalen unde Commenduer des huses to Stenforde Unde Mester der huese Sunte Johans Baptisten in Oestvrees-
land Bekennen in dessen apenen breve So wij in den jaer unses heren dusent veerhundert vijffundetzeventich hadden visiteren laten overmyds personen
uut unsen huse to Stenforde vorg. Oesterwijdewert Unde uns do tertijd van der visitacien voer qwam in den generaell Capittel tor Muda, wo dat vorg.
hues, zeer verderfflick ghewoerden weer van Commenduren to Commenduren Unde meer dan neghenhundert guldenen ghebracht weer in Schulde, dat
wy node hoerden Also dat wy uns dat up bespreken, myd den Commenduer unde kelner to Oesterwerum unde hebben em ghebeden, dat ze dat vorg. hues
to Oesterwijdewert een jaer an nemen wolden umme god unde umme unser bede wylle, to beseene wo veer men raken konde myd des vorg. hueses
renthe, der Schulde wat mede aff to legghene, daer des meest noet wer to vernoghene Also dat ze gode ten eren, den vorg. huese to Nutticheit
unde uns to wyllen, dat een jaer an nemen Unde in den jaer der Schulde eynen groten deel afflachten myd eres selves gude etc. So wy dan in
den jaer dar na eyn Capittell vorscreven hadden in unses ordens hues to Werphum des neysten Mandages na Petri ad vinculam int jaer dusent
veerhundert zessundetzeventich Beclagheden sijck de vorg. Commendur unde kelner to Oesterwerum wo ze der schulde to male vele affghelacht
hadden unde ghenerleye wijs raken konden myt des vorg. hueses Renthe So hadden ze geerne weeten, waer ze solden des eres waer ne-
men oft em dat vorg. hues weder affghenghe Unde segheden uns dat vorg. hues weder up in den Ze er verleghede gelt mochte weder-
krijgen So Begherde wij raan van allen commenduren dar jeghenwordich weren wo wij best dar mede doen mochten up dat vorgen.
hues unverderfflijck bleve Dem. allen ghereaden duchte dat men dat vorgen. hues erst overbodich weer, den Commendur to Dunebroke dar
dat hues vorg. een vorwerck ynne weer, dat also gheschach Meer he en wolde des nicht an nemen Unde entseghede syck des, went he
em nicht geraden en konde umme veleheit der schulde So bat ich Broder Bernd vorg. myd Consente der pleghere de do by my
weren, den Commenduer van Oesterwerum, dat he dat hues an neme Ick wolde em dat incorporeren myd willen unde Consente des ghemey-
nen Convents to Stenforde up dat dat hues so jemerlijke nicht vordorven en bleve, daer he syck een weynich up besprack myt zijnen
kelner Unde antworde he wolde dat hues annemen gode ten ere unde den guden Sunte Johannes unde omme myner bede willen in den
he unde zijne nakomelincge so besorghet woerden wan he unde sijn Convent dar groet an ghelecht hadden nicht affghehendich ene woer-
de gemaket So hebbe ich dat hues to Oesterwijdewert incroporert den husen tot Oesterwerum myt willen myt wettenheit unde consente
des vorg. huses to Stenforde Hijr na bescreven Ick Broder Bernd van Schedelicke Balijer up Westphalen unde Commendur des huses to
Stenforde unde Meester der huese ordens Sunte Johans Baptisten in Oestvreesland Bekenne unde betughe in dessen apenen breve, dat ich
myd wyllen unde wetten des ghemeynen Convents van Stenforde hebbe incorporert unde incorporeer dat hues van Oesterwijdewert
demen huese van Oesterwerum myd all sijner tobehorynge beweghelick unde unbeweghelijck to ewygen daghen van uns oft van
all unsen nakomenen Zunder wederropen daer by to blyvene, dat hues vorg. to Regeren unde hanthaven in gheistliken
unde wertlijken stucken nicht uutghescheyden Sunder alle arghelijst Myt dusdanen underschede, dat een Commendur unde
kelner in der tijt unde dat gemeyne Convent van Oesterwerum dar van staen unde doen sall alle gherechticheit des vorg. hueses
alz dat henther to gedaen heft unde ghewontlick ys Respons Visitacien Capittelkost denst upsaete nicht uutghesproken meer
noch myn Unde so love ich unde ghemeyne Convent vorg. vor uns unde alle unse nakomenen den Commendur van Oesterwerum
unde sijnen nakomenen rechte gude waerscapp to done der incorporacien so vake als dat ghevelle oft noet woerde bueten eren
schaden Sunder arghelijst Des to Tughe der waerheit hebbe ich Broder Bernd Balijer unde Commenduer vorg. myn inghesegel vor
my an dessen breff gehangen To merer vestnisse hebben wij Broder Hinrick Hornyken prior Broder Ernst van Beveren Schaf-
fener Broder Johan van Geysteren pretancie meyster Broder Godert van Graes Rytmester unses vorg. hueses, unse inghesegele ze-
mentlike vor uns vor unse ghemeyne Convent unde vor alle unse nakomene an dessen breff wytliken ghehangen Gegheven in den
jaer unses heren Dusent veerhundert zessendetzeventich up Sunte Bartholomei Avent des hilligen Apostels.

x

x

Archiv	Groninger Archieven
Bestand	Kloosterarch.
Zugangsnummer	172
Inventarnr.	218
Regestnr.	602
Olim	Arch. Klooster Oosterwierum, inv.nr. 2, reg. 14. Reg. Feith 1476.48.
Jahr	1476
Datumcode	vBartho

x

x

Kommentar	Met de zegels van Bernd van Schedelich, Hinrick Hornyken, prior, Ernst van Beveren, hofmeester, Johan van Geysteren, pietantiemeester, en Godert van Graes, rentmeester

x

Material	perkament