Wolterus, abt, Gherardus, prior, Wolterus, keldermeester, Bernardus, bursarius, en de gemene conventslieden van Aedwerth verklaren toe te staan aan Herman Lewe het gebruik van de lucht boven een huis en hofstede aan de noordzijde van de Brughestrate.

Wij Wolterus abt van aedwerth, Gherardus prior, Wol-
terus Kelnaer, Bernardus bursarius ende voirk. ghemene
conventslude des cloesters voirscreven bekennen ende betugen
myt dessen openen breve dat wij voir ons en onsse nako-
melynge hebben opghedragen ende overghegheven ende
myt vrijen willen gheghondt ende toghestaen Herman
Lewe ende sijnen erffghenamen toe hebben ende to
bruken vrij ende quijt erfflicken ende ewelicken de
lucht over onsse husynge ende hoffstede, die wij
ligghen hebben op die norderzijt in die Brughenstrate
dair Herman Lewen huijs ende hoffstede naest bij leghet
op die westerzijt so luttyck ende groet, ghuet ende
quaet so als he die nu ter tijt hevet ende bruckende
ys van onsen erve voirscreven is sijne slaepkamer op die
oesterzijde van sijner voirhuse ende oick is sijne kokene
beyde boven ende beneden, also dat wij abt ende
conventslude voirscreven offte besitter des voirscreven huse
ende hoffstedes datselve huys nyet en sullen betymeren
teghens hurens voirscreven kamer ende kokene so nae offte
so hoge dat Hermens voirscreven lucht daer mede be-
hyndert offte bekrenckt mach worden, voir sodane
waldaet als Hermen voirscreven bij ons ende onse convente
bewijset hevet. Ende weert oick sake dat wij abt
ende conventelude voirscreven offte besitten des sulve huse
op onsser erve ende hoffstede voirscreven: ene wonynge
wolden tymeren tot yenygen tijden op die oesterzijt
Hermens voirscreven brouhuys ende dair ene Krympe
leten legghen tusschen Hermens voirscreven brouhuys ende
dat nye tymer, so sal Hermens voirscreven ende sijne
erffghenamen die lucht mede hebben ende gheneten van
der selver krympen in sijn brouhuys beyde boven ende
beneden. Myt uuthanghende vensteniss sunder arghelist.
Dat oirkonde wij abt voirscreven voir ons ende onsse
conventslude voirscreven en onze nakomelynge myt onsen
groten Seghel an dessen breeff ghehangen. Int jair
onses heeren Dusent vierhondert ende tneghentich
des manendaghe nae paechsachten.

x

x

Archiv	Groninger Archieven
Bestand	Kloosterarch.
Zugangsnummer	172
Inventarnr.	40
Regestnr.	785
Olim	Reg. Feith 1490.20.
Jahr	1490
Datumcode	LpQuaMod

x

x

Material	papier

x