Bernt Langen, richter tho Duthe oorkondt, dat ten overstaan van hem en zyne koernoten de gemeene buren van Overlangen en Nederlangen aan het convent van ter Apel hebben verkocht een stuk land de Barenvledder en de Emeschemaet genaamd, gelegen in de mark der beide genoemde buurschappen, dicht bij het land dat het klooster aldaar heeft en dat de koopsom door de verkoopers is opgebracht aan den bisschop van Munster en Osnabrück, als bijdrage tot de zware landschatting wegens den oorlog tegen de wederdoopers te Munster.

Ick Bernt Langen geswaren Rychter tho Duthe van bevele des hoichwerdigen in god hoichvermoegden Ffursten unde heren heren Ffransen byscop der
Styfften Munster unde Ossenbrugge Administrator tho Mynden myns genedeigen lieven heren doe kundt tuge ende bekenne overmydts dassen openen
bezeggelden breve dat voer my up dach dato dusses breves in bywesen der koernoten unde
bystanders hyr undergescreven in eyn Recht open heget gerichte
sunderlynges tho dusser naebescrevenen saeke geheget wort Erschenen unde gekamen syn
de Ersame Goedeke Hyllynck Steven tho Langen Evert Jonne
Johan Meyerinck myt sampt den gemeynen buren ffryen unde eygen van Overlangen unde
Nederlangen sachten unde bekanden all daer voer se unde oere
Erven unde Anerven geboren unde ungebaeren Jegenwordich in den sulven gerichte dat se
myt rypen raede gudes verstandes unde walbedachtes moedes
wyttyger synnen eyn yder unbedrungen myt consent der Erffixen in der alder besten
saeke wyse unde forme se yummer doen solden unde mochten redelycken
unde rechtelicken in enen steden rechten vasten ewygen erfflicken unde unwederroplycke koepe hadden verkofft unde verkofften all dar samptlycken de voerscreven
Goedeke Hyllinck Steven tho Langen Evert Jonne Johan Meyerinck sampt de gemeynen buren unde lethen up myt hande unde munde ingewaelt unde
eygendom soe syck myt Rechte geboert In eyne fredesame unde ewyge upboringe bruyckenei besyttener hebbener were Erfflyck eygen voer vry doerslachtych
guet dem werdigen Ersamen unde geystelicken heren heren Gerde Hasselt Prior unde gemeynen Convent Orden des hilligen Cruces tho Apell unde
oeren naekomelynge Een stucke landes de Barenvledder unde de Emesche maet genoempt myt
heyde unde weyde moerlandt uth oerer Marcke der bey
der burscappen voerscreven Welker landt naest by des Cloesters vorgescreven eygen
lande gelegen Anfancklyck van deme pael upgesath indt suyden doer
den Barenvledder dyck bes am dem pael staende twyschen dat broek unde lyntloe indt
moer wedder van deme pael streckende lyn recht indt westen
tho deme paell by dat rivere de Ae geheyten by dess papen hutte up gerychtet de Ae
bylanges indt norden bes an dat Cloesters voerscreven eygen lande
streckende myt syner alyngher tho horinge olden unde nyen rechtycheyt myt heyde water unde weyde myt torve unde twyge soe als dat daer ther stede
schinbaer ys liggende Welker Erffnysse de up gemelten voerkopers myt oeren medebescreven gengen des deger unde all uth unde deden daer up genslicke
vertychnisse soe se myt Rechte solden Alsoe dat se under oere medebescreven Ervent unde anervent noch neymant van oerer aller wegen nummer nae gyff
te dusses breves neynerley gewalt eygendom eder rechticheyt se synne geystelick eder wertlick an dat voerscreven landt soe uth gepaelt sal hebben
eder verwachten wesen, Alsoe dat die voerscreven koopers unde oere naekoemelynge moegen soe dane landt voerscreven ploegen unde bouwen verkoepen
verhuren versetten weyden keren unde wenden besloeten begraven dycken unde dammen tho oeren besten bruyken sunder yemandes besperinge unde
inseggent Wante die verkoeperen bekanden voer my Richter voergescreven dat se daer voer eene Summa van guldene in reden getellden golde tho
oeren genoege unde wyllen van den koeperen guedtlyken betaelt unde vernoeget weren
Welke summa van penningen se uth verwyllynge unde
inrumynge des hoichgedachten myns genedigen Ffursten unde heren unde gemeyner lantscap
tho stuyr unde uproringe erer upgelachter swarer lant
schaettynge des kryges halven tegen die wederdoepers tho Munster gekert unde genuttige hebben up dat myns genedigen Ffursten unde heren Syn
genaede eygen unde ffrigen oer Erven Ock der Jonckeren luden eer erven all mochten mede gereddet unde gevryet woerden unde unbeschuldiget
blyven Unde ys gescheyn myt wyllen Consent unde vulboert des Hoichgenoempten myns genedigen ffursten unde heren unde syner ffurstlichen
genaeden Amptluden in Emslandt myldinge syner ffurstelichen genaeden gegeven Seggell
unde breve voerwylliget unde tho gelaeten Unde die
voerkoeperen laveden den koeperen hyr np myt hande ende munde unde deden indt gerychte hanttastynge des voerscreven koepes tho staende bekandt tho syn
unde guede vullenkoemende stede ewyge vaste unverbroeken waerscap tho doene voer se
oere Ervent unde anervent unde voer alle de des tho rechte
spreken wyllen Were overst saeke dat den voerscreven koeperen unde oeren medebescreven
an dat voerscreven landt myt syner rechticheyt yenich hynder besperinge eder
gebreck an waerscap schege unde der halven in schaeden queme woe dat ya tho queme
laveden voer my Eychter de vacken gedachten verkoeperen voer se unde
oere Erven unde anerven dat men daen soe danen hynder gebreck kosst unde schaeden
daer umme geleden unde gedaen moegen soeken wynnen unde maenen
van den upgemelten verkoeperen van oeren Erven unde anerven in unde ut oeren guederen
varende have die sy up dach dato dussen breves hebbet offte hyr
naemaels tho krigen mochten woe dat ja gestaelt waer de synnen belegen in daerpen in
steden leen offte eygen neen daer van uthgescheyden myt pandinge
kummer ende besaete myt allen gerichten geystlick eder wertlick myt oerer een offte
myt beyden tho gelichen welcker hem alder best bequemest ys neyn recht den
anderen tho hynderen unvervolget unde onverclaeget offte mede verclaeget bes soe lange
dat Prior unde Convent voerscreven soedaene koepes deger unde all geholden
unde vullentoegen werde Wer overst dat nu offte in tho koemenden tyden myt deme velt
lande voerscreven anders woe over hen voerkofft befunden woerde Soe
synt voer my Richter upgemelten in dat sulve gerychte gekaemen de Ersamen Evert tho
Wylholte Jurigen tho Wylholte unde Wolter Holler tho Langen alse
rechte principael Saekewolders unde laeveden voer unde oere Erven unde anerven gebae-
ren unde ungebaeren soe dane uplatinge Erffkoep des voerscreven landes
woe van dem gemeynen buren Overlangen ende Nederlangen verkofft ys deme upgenelten
Prior unde gansen Convente eygen waeren tho wesen unde alle
tyt guede waerscap tho doene unde offte nu de gemelten koepers des in schaeden quemen
woe de dan tho quemen Soe verwylkoerden Evert Jurigen unde Wolter
voerbenoempt dat dan die kleggers soelen macht hebben soe danen schaeden em drie tho
gelick off een yder bysunder aff tho wynnenne unde tho maenne myt
Rechte kummer unde besaete sunder eer unde eerer Erven unde anervent weder rede off
ovelen moedt uth oeren alyngen guederen de se nu offte dan hebben eder
tho krygen mochten bes soe alnge die klaegers oeren schaeden tho oers sulves seggen
deger unde all untrechtent synt unde des nergen mede tho vermynderen
unde geen partye teghen dussen breff noch inholt dusses breves myt neynen stucken
the weder spreken Ock neynerley rechtycheit privilegien offte andere gewon
te tho gebruyken Alle Argelyst nyefunde uth besproeken Want dan soe dane koep vertichnis unde uplaetynge suiker Erffguderen voer my Bernt Langen
Rychter voerbenoempt in eynen gehegden gerichte unbesproken ys gescheen daer myt my
an unde over weren koernoeten des gerichts Johan Hoppe Laeke tho
Raeten umstenders heer Johan Koerst pastoer tho Laetten Lambert Langen Inzigen voeget
tho deme Nyenhuse unde Herman Synnynge Unde des
ther Orkunde unde tuychnisse der waerheyt Soe hebbe yck Berndt Langen Rychter voerscreven myn Ingeseggell van gerichts wegen wytlicken unde
kentlicken an dussen breff gehangen Datum Anno domini dusent vyffhundert unde twe unde
veertych Up maendach voer Petri ad vincula.
MARGE: ............ van ... droste tot
Switert van Bokel droste tor Vastnouwe raed in g.f. unde h.
Jurgen van Munster droste Iohan Reyken rentemester in Emeslant Johannes Horst pastor in Lathen manu propria.
DORSO : Littera de Barenvledder.

x

x

Archiv	Groninger Archieven
Bestand	Klooster Ter Apel
Zugangsnummer	1373
Inventarnr.	39
Regestnr.	217
Register Feith	1542.010
Jahr	1542
Datumcode	LaVinPet

x

x

x

x

Kommentar	Het het zegel van Bernt Langen in groene was

x

Kommentar	N.B. Vermeld Feith Reg. 1542 no. 10.