| Nummer:msk525025a | Datum:20. Aug. 1440 | Überlieferung:Abschrift | Fundstelle:Manuskripte Kunst, inv.nr. 525, S. 025-26, nr. 20 |
Bescheinigung der Häuptlinge Imelo zu Grimersum und Friedrich zu Larrelt über den Empfang einiger Kleinodien ihrer Nichte Adde.
Wy Imelo to Grymissum ende to Oesterhusum, Frerick to Lherlt ende to Hynt hovetlinge, wy bekennen ende betugen apenbaer voer alle de ghene, de dessen breeff seen, lesen ofte hoeren lezen, wo dat wy hebben untfangen van Itzyngeheert to Norden, van Sibben unser suster ende ghemoye wegen zaliger ghedechtenisse, een span, dre strengede rynge, eyn myt een saphyr, enen halsbant, dre mansgordelen, eyn wivegordel, eyn sulver stuckelbant, myt ander cleyn sulverwarck, dat tosamen gereven was in eyn snoerken; waerumme wy Imelo ende Frederick vorscreven scelden Adden unse nichte ende hoer erfnamen van des vorbenanten heert vry ende quyt, voer uns ende unse erfnamen, voer alle ansprake van desse vorscreven guoder ende cleynheyt, de hyr gescreven synt to ewygen tyden. In oerkunde der waerheit so hebben wy Imelo ende Frederick voerbenant unse zegelen laten drucken byneden up dit spacium dessen breves. Int jaer uns Heren als men screef MoCCCCo ende XLo, des saterdages na assumptionis Marie.
