| Nummer:msk525033 | Datum:Emden, 1. Sept. 1454 | Überlieferung:Abschrift | Fundstelle:Manuskripte Kunst, inv.nr. 525, S. 033-34, nr. 24 |
Die Ostfriesischen Landrichter Eerd und Beno entscheiden, dass die von der Hymba hinterlassenen Güter nach Landrecht ihrem Oheime Imelo von Hinte zugehören müssen.
Wy junghe Eerd unde Beno, landrechters in deme gheebede unses ghenedeghen juncheren Olrickes, to Norden, Berum, Auwerke, Emeden etc. in Ostfreeslande hovetling, doen witlich, kundich unde openbaer in unde myt dusser openen scrifft allen erbaren vromen mannen unde allesweme, dat wii nae inholde unde utwizinghe enes rechten lantrechtes hebben ghevunden, ghedelet unde toghewiset dem erbaren manne Ymelen, to Hynte hofftlinge, zoe enem rechten erfgenamen all syner susterdochter naeghelatene guet, vrow Hymben saliger dechtnissen, repplich unde unrepplich, in erve edder wat guderen unde yeghenynghen dat ghelegen sy, Ymelo dat to bezitten, bruken, vorkopen, vorgheven offt sinen rechten erfnamen unde naekomelingen te ervende, unde zee voert alzoe to ewighen daghen sunder wederspreken enighes rechtes. Dusse dedinghe, domynghe unde deling vorbenomet ys ghescheen to Emeden, in Johannes huze van Wynsum genant, burgermesters doesulvest in Emeden, in tyeghenwordicheit vele erbaren guden mannen unde besunderlingen Egbert, unsen juncheren vorbenomed voghet darsulves, Johans vorbenomed, Brungher unde zine broders van Myddelem; unde to ener merer bekantnisse der waerheit unde standachticheit dussen vorbenomeden sametlich hebben wy Eerd unde Beno vorbenomed unse inghezeghele witliken doen hanghen an spacium dusses breves. In dem jare als men screeff nae der boerd Christi Jhesu unses Heren veerteynhundert jaer ok veer unde veftich, in dem dage Egidii abbatis.
