Vrederic van Pes en zijn kinderen verklaren een onroerend goed aan Roelf van Echten te hebben verkocht en dragen het over.

Wy Vrederic van Pes, Roelof ende Aernt, miin kinderen, doen kondich ende openbaer allen luden, die desen brief zullen
zien of horen lesen , dat wy hebben vercoft ende vercopen mit desen openen brieve Roelve van Echten ende sinen
erfghenamen die halve maet, die gheheten is Waninghe Blicmaet, die gheleghen is in der marke van Pes to den westerende van Roede om een summe van ghelde, die ons ende onsen erfghenamen wittelic ende wael betaelt is, ende wy, Vrederic, Roelof ende Aernt voers., quytscelden ende oplaten over den buren van Pes Roelove van Echten voers. ende sinen erfghenamen dese voers. halve maet to brukene eweliken ende ommermeer sonder enigherhande wedersegghen ofte ansprake van ons ofte van onsen erfghenamen. Ende wy solen hem dese voerscreven halve maet waren ledich ende loes, vri ende ombelet voer alle dieghene, die daerop spreken moghen mit rechten Drenschen lantrecht, al arghelist uutghesproken ende nie vonde ofte enigherhande intrecken, die men deser voerscreven vorwaerden dichten mach to hindere of fysiren. In kennessen der waerheit so heb ic, Vrederic van Pes voers., desen brief bezeghelt mit minen zeghel voer mi zelven, voer Roelof ende Aernt, miin kinderen, to enen ewighen tughe deser voerscreven vorwaerden. Ende wy, Roelof ende Aernt, lien al deser voerscreven saken onder zeghele Vrederics, onses vaders. Ghegheven int jaer ons Heren dusent driehondert ende een ende tachtentich op sente Laurencius dach.

x

x

Bestand	Oorkondenboek Groningen en Drenthe
Nr	694
Olim	Naar het origineel op het huis Echten, hoog 11,8, breed 23,5 cm.
Jahr	1381
Datumcode	Lauren

x

x

x

Kommentar	Aan het stuk hangt een klein rond zegel in bruine was, vertonende een schild met drie adelaars, geplaatst, 2, 1; randschrift onleesbaar.

x

Material	papier

x

Editionen	P.J. Blok e.a., Oorkondenboek van Groningen en Drente, II (Groningen 1899), nr. 694.