| Nummer:ogd0996 | Datum:11 sept. 1398 | Überlieferung:Editie | Fundstelle:Oorkondenboek Groningen en Drenthe, nr. 996 |
Hertog Albrecht van Beieren verklaart, dat Ayleko Ferhildema en Reyner Eysingha het landschap Hunsingo met al hun bezittingen tussen Lauwers en Eems aan hem hebben opgedragen en hij ze wederom aan hen en hun rechtverkrijgenden in erfleen heeft gegeven.
Aelbrecht etc. doen cond allen luden, dat voer ons ende voer onsen ghetruwen rade ende mannen ghecomen syn Ayleko Ferhildema ende Reyner Eysingha, hoeftlinghe tusschen der Lauwerze ende der Eemse in Oestvrieslant, ende hebben ons upghedraghen ende quijtghe-scouden mit horen vryen wille den rechten eyghendom van Hunsgherland mit allen heerlicheden, sloten ende goeden als sy nu ter tijt hebben, houden ende besitten tusschen der Lauwerze ende der Eemse, voert alle ander lande, die sy nu ter tijt hebben, houden ende besitten ende noch vercrighen ende becraftigen sullen binnen den voirs. palen of daerbuten, die ons niet toe en behoren, mit husen, sloten, heerlicheden hoghe ende laghe, rechte, renten, vervallen, nutscip ende profijt daertoe behorende, mitten zeevonde, in alre maniren als sy dat nu ter tijt hebben ende houden, of hiernamels vercrighen sullen buten den onsen, hetsy ghemeen te samen of verscheiden. Welke lande, huse, slote, heerlichede hoghe ende laghe, rechte, renten, vervallen, nutscip ende profijt wy voer ons ende voer onsen nacomelinghen verliet hebben ende verlien mit desen breve Ayleko ende Reyner voirnoemt ende elx van hun te houden van ons ende van onsen nacomelinghen, hunluden ende horen nacomelinghen tot enen onversterfliken erflien. Ende waer sy of eenig van hunluden gheen wittachtich gheboerte en lieten na hun, soe mochten sy ende elx van hun die voirs. heerlichede ende goeden laten ende bewisen te comen na hare doot up sulke lude een of meer, die hun ghenoeghen sullen, maech of vremde, mit horen testamente of openen brieven alst hun ghenoeghen sal. Ende soe wie van horen erven of andere, daer sy die goede up bewisen sullen als voirscreven is, aen ons of an onsen nacomelinghen versochte of versoeken sal als recht is na dode Aylekoz of Reyners voirscreven of enich van hun, dien sullen wy of onse nacomelinge die voirs. heerlicheden ende goede verlien ende verleenen in alre maniren als wy voren den voirs. Ayleko ende Reyner ghedaen hebben. Ende want Ayleko ende Reyner voirnoemt verre van onsen lande gheseten sijn ende overmids vresen der weghen binnen sjaers na rechte ende custume van onsen lande hoer erven ende nacomelinghen die voirs. heerlicheden ende goeden niet versoeken en moghen, soe hebben wy hunluden alsoevele gratien vorder ghedaen dat hoer erven of dieghene, dien sy die voirs. goede gunnen sullen, jegen ons ende onsen nacomelinghen niet versumen noch verbueren en sullen mit waenversoeke binnen drie jaren na dode van enighen van Ayleko of Reyner voirscreven. Ende van den voirs. goeden ende heerlicheden hebben ons Ayleko ende Reyner voirnoemt hulde, eede ende manscip ghedaen als mannen horen rechten heer sculdich sijn te doen ende ons gheloeft in goeden trouwen ons ende onsen erven te dienen ende onse palen van Vrieslant te hulpen houden ende die te starken tiegens allen denghenen, die ons dairin hinderen of deren wilden of onghehoersamich worden, behoudelic dat sy ons niet ghehouden en sullen wesen te dienen buten den palen van Vrieslant, ten ware of sijt van haren goeden wille gerne cloen wilden. Ende wy gheloven hun weder voer ons ende voer onsen nacomelinghen hunluden te starken in den goeden, landen ende heerlicheden voirscreven, of yement wie hi waer den voirnoemten onsen mannen in den voirs. goeden ende heerlicheden hinderen of crencken wilde, als een heer sinen leenmannen sculdich is te doen , wanneer wy of onse nacomelinghe van hun ende van horen nacomelinghen bi brieven of ghewaerden boden des vermaent worden. Voert wanneer bi dode Aylekoz of Reyners voirnoemt hoer erven of dieghene, dair sy die goeden aen bewisen sullen, dieselve heerlicheden ende goeden van ons ende van onsen nacomelinghen versoeken of ontfaen sullen, soe sullen hoer erven of dieghene, die die goede versoeken of ontfaen sullen, alle dese voirscreven voirwerden vervullen ende gheloven in alre manieren als voirscreven is. Ende want wy voer ons ende voer onsen nacomelingen gheloeft hebben den voirs. Ayleko ende Reyner ende horen nacomelinghen alle pointen in desen brieve begrepen te houden ende te doen houden in alre maniren als die voirscreven staen, soe hebben wy desen brief open besegelt mit onsen segele hieran ghehanghen. Ende om die meerre sekerheit ghebeden ende geboden onsen lieven zonen ende erfnamen heren Willem van Beyeren, grave van Oestervant, ende heren Johan van Beyeren, nu ter tijt elect van Ludich ende grave van Loen, dat sy desen brief open na ons ende mit ons besegelen. Ende wy, Willem van Beyeren, bi der genaden Goids grave van Oistervant, ende Johan van Beyeren, bi derselver genaden elect van Ludic ende grave van Loon, zonen ende erfnamen ons liefs heren ende vaders voirscreven, om bede ende geboitz willen denselven ons liefs heren ende vaders hebben desen brief open na hem besegelt mit onsen segelen Gegeven in den Hage upten elfsten dach in Septembri anno XCVIII.
