| Nummer:ogd1003 | Datum:11 sept. 1398 | Überlieferung:Editie | Fundstelle:Oorkondenboek Groningen en Drenthe, nr. 1003 |
Hertog Albrecht van Beieren machtigt zijn leenman Widzel Ockenzoon de bezittingen van Omeko Snelgerzoon, Haye Wibben, Tammo Gockenga en Menno Howerda aan te nemen en hun die weder in leen te geven.
Aelbrecht etc. doen cond allen luden, dat wy bevolen ende ghemachtiget hebben , bevelen ende mechtighen mit desen brieve onsen lieven ende ghetruwen lienmanne Widzel heren Ockenzoen te ontfaen ende aen te nemen tot onser behoef den rechten eyghendom van sulken landen, sloten, heerlicheden ende goeden, als hebben, houden ende besitten Omeko Snelgersoen ende Haye Wibben, Tammo Gockenga ende Menno Howerda tusschen der Lauwerze ende de Eemse in Oestvrieslant, ende van sulken landen, sloten, heerlicheden ende goeden als sy vercrighen sullen, mit allen renten, vervallen, nutscip ende profijt als daertoe behoren, ende die van onser weghen weder te verlien Omeke, Haye, Tammo ende Menno voirs., te houden van ons ende van onsen nacomelinghen hun ende horen nacomelinghen tot sulken rechte ende leen ende in alre manieren als onse brieve, die wy ende onse lieven zonen, heer Willem van Beyeren, grave van Oistervant, ende heer Johan van Beyeren, nu ter tijt elect van Ludic ende grave van Loon, hunluden daeraf gegeven hebben, inhouden ende begripen. Oic mede hebben wy ghemechtiget Widzel voirnoemt te ontfaen van onser weghen sulke hulde, eede ende manscip, als die voirnoemte Omeko, Haye, Tammo en Menno ons van den voirs. goeden doen sullen ende sculdich sijn te doen ende Widzel voirs. ons selve ghedaen heeft van sulken goeden, als hi ons upgedraghen heeft, in alre manieren als sy ons selven doen souden, of wy lijflic dair jegenwoerdich waren. Ende van der voirs. updrachte, verlyinghe, manscip, hulde ende ede sullen ons Widsel ende die voirnoemte Omeko, Haye, Tammo ende Menno hoer beseghelde open brieve weder senden, als daertoe behoert. In orcunde etc. Gegeven in den Haghe upten elfsten dach in Septembri anno XCVIII.
