| Nummer:ogd1221 | Datum:28 sept. 1405 | Überlieferung:Editie | Fundstelle:Oorkondenboek Groningen en Drenthe, nr. 1221 |
Twee Ommelander geestelijken en zes Groninger burgers verbinden zich tot nakoming van de vredesverdragen gesloten tussen de Bisschop van Utrecht en Groningen met de Ommelanden, die op 18 october te Coevorden zullen worden afgekondigd en nader bevestigd.
Wij, Rembertus, persona to Bafels, Elle van Middelstum, praest van Usquaert van Hunsghelande, Evert Sickinghe, Sweder van Winden, Reynolt Huging, Aleph Schellinghe, Coppijn Jerix ende Egbert van Echten, borghers in Groninghen, maken kont ende kenlicken allen luden mit desen openen brieve, dat wij hebben gelaeft van weghen der stat van Groninghen ende der lande van Vrieslant, die viande gewoirden sijn ons heeren van Utrecht, dair gued voir te wesen die zoen te haelden ende te volbrenghen mit brieven ende mit zegelen als die zoenlude die zoen begrepen ende bescreven hebben an beyden zyden na inholt der cedulen, die dairup ghemaect ziin ende bezegelt zijn, die men uutsegghen sal to Covoirden up sente Lucasdach naestcomende, dair die straet up ontslaghen is ende die gevanghen an beyden ziden up quijtgescholden sijn. Ende weert zake dat dair enich gebrec invel van der stat van Groninghen of van den voirs. landen, so loven wy ende zekeren in gueden trouwen ende by onser eer dairvoir in te comen to Campen acht daghe na sinte Lucasdage voirs. ende dair nyet enwech te scheyden, eer die voirs. zoen uutgezeghet is, ende die brieve van der zoene gescreven bezegelt ende overgegeven zijn an beyden ziden na inholt der voirs. cedulen. Ende als dat geschien is, so en solen wij van deser voirs. loefte nyet voirder belast wesen sonder argelist. In oirkonde so hebben wij, Elle, Evert, Sweder, Reynolt, Aleph ende Coppijn voirs., onse segel beneden an desen brief gehanghen, dair ons Rembertus ende Egbert voirs. to deser tijt an ghenoecht om ghebreeck van onsen segelen. In den jaer ons Heren dusent vierhondert ende vijf up sinte Michaelsavont. Dit is die dedinghe van der zoenen, die ghededinget is tusschen minen heren van Utrecht an die een zijd ende der stat van Groninghen ende den lande van Vrieslant, die in der vede gheweest hebben, an die ander zide. Int ierst dat die stat van Groninghen zal overgeven minen heren van Utrecht die gherichten ende heerlicheit, geheiten die heerscap van Zeleweert, also als die stat voirs. die in pachten gehat heeft van der kerken ten Doem tUtrecht. Item so sal mijn heere der stat van Groninghen verpachten dat gericht binnen der stat, also te verstaen, dat se dat hebben soelen binnen der muren en voirt zudewert buten der stat thent der stede toe, dair men dat vredecruus in voirtyden pleecht te setten in den vryen merct ende voirt als dat van oelds gegaen heeft ten oosten, ten westen ende ten noirden. Item sal die stat van Groninghen minen heren overleveren sulke brieve als si hevet van den gerichte voirs. van den capitel ten Doem voirs., ende mijn heere sal der stat weder leveren sulke brieve als si den voirs. capitel dairup weder hebben gegeven. Item die stat van Groninghen sal minen heeren geven voir dat voirs. gericht in Groninghen acht ende twintich oelde Vrancrixe scilde des jairs of payment dairvoir, te betalen tot Covoirden jairlix up sinte Michaelsmisse na forme des capittels brieve; ende die bode, die die pacht betalen zal, die zal veylich wesen uut ende to huus. Item solen die van Groninghen datselve gericht versoeken an minen heren ende sinen nacomelinghen tot elken twintich jaren ende tot elken hondert jaren na formen des voirs. capittels brieve. Item die stat van Groninghen mach nemen tot enen schulte enen van horen borgheren, ween dat sy willen, ende die sal sinen eet doen voir mijns heeren amtman in den gerichte van Zelwerden ende die sal den eet ontfanghen van mijns heren weghen in alsulker formen, dat hee malc ordel ende recht doen ende wedervaren laten sal na oelden heercomen des gherichts van Groninghen; ende den schulte mach die stat van Groninghen versetten also vaecke alsse willen. Ende also dicke als dat gesciet, so sal die nye scult sinen eet doen voir den amptman van Zeelwert als voirs., ende die sal den eet ontfanghen; ende dede he dair voirwegeringhe in boven drie daghe lanc na der ierster versokinghe, so mach die borghermeyster van Groninghen den eet te deer tijt ontfanghen als die amptman solde gedaen hebbe als voirs. is. Item die amptman van Zeelwert als up Gho ende Wolt sal dat ampt berichten in sulken recht, als dat recht dair gelegen is ende van oeldes heer gecomen is. Item sulke broecke als geschien sijn op Go ende Wolt binnen der vede, die sullen quijt wesen, dat is te verstaen, die onbericht sin, mer wes bericht is, dat sal bericht bliven. Item dat die van Groninghen betalen solen al afterstallinghe pacht van verledenen terminen, die onbetaelt sijn, rurende van der pacht, die sy van den capittel hadden. Item sal men nederlegghen alle slote, die in der veden upgeslaghen sin, als Blanckeweer, Blanckenvoirt, to Peyse, to Eelde ende ter Ammerckehoern. Item sullen Hay van Westerwolde, Elde Gockinghe ende voirt al gevangen ende al onbetaelt gelt, dair die termijn nyet van geleden en is, quijt wesen an beyden ziden, mer die gevanghen soelen betalen redelicke teringhe ende sluetgelt; ende dit is ghesloten up sinte Michaelsavont. Item soelen Eylken Anste ende sijre broder bezoent wesen op hoir alinghe erve ende guet, dat sy hadden, doe die vede tusschen minen heere ende den van Groninghen ierst toginck, ende dat soelen sy hebben also als se dat nu vinden ende dat gelegen is ende wesen ghelijc anders hoeflinghen hoers rechtes ende heerlicheyt in den lande to bruken, mit voirwairden dat sy quijt ende vry solen wesen antughes van rove, van brande ende van allen zaken, die voir desen daghe gheschien sin. Item Tyabbeken van Westerwolde ende dat lant van Westerwolde solen bezoent wesen. Item Enne van Sluchter sal desghelijcs bezoent wesen up sijn alinge erve ende guet als hijt nu vint, ende wesen vry van antughe, als voirs. is. Item Haye van Westerwolde ende Elde voirs. solen bezoent wesen up hoir guet, als se dat vinden, ende hoirs guets to bruken als ander hoeflinghe ende dair en sal gheen antuuch over gaen, als voirs. is. Item sal gaen roef toghen roef, brant toghen brant, naem toghen naem, dode toghen dode, die in der vede ghescien sin, ende die solen quijt wesen dat een toghen dat ander an beyden syden. Item Keen van den Broeck sal bezoent wesen, of he wil. Item Omeken Snelghers ende sijn broder, Uneke Amese ende sijn broder, Reyner van Hersen, Bunneken Elinghen ende sijn zoen solen bezoent wesen up hoir erve ende guet. Item weer dat yemant an enigher sijt voirs. up den anderen yet te seggen hadde van zaken, die binnen vreeds gheschien weren of ander zaken, dat sal malc bybrenghen in scrifte tot Covoirden up sinte Lucasdach naestcomende; ende des dan nyet en dede, dair en sal na gheen aenspraec van wesen; van der zoen weghen ende van der anspraec weghen voirs. sal men gheven ende nemen, dat den zoenluden bescheit dunct wesen, of men sal des als bliven by den overman, weert dat die zoenlude niet en overdroghen. Item mijns heeren vriende van Utrecht ende der stat vriende van Groninghen ende der Vresen, die in die vede horen, solen comen tot Covoirden up sinte Lucasdach naestcomende die zoene uut te segghen ende die brieve, die dairaf wesen solen, beyde van der zoene ende van der pacht des gerichts van Groninghen, malcanderen dair over te leveren; ende die brieve van der pacht solen bezegelt wesen mit segelen mijns heeren van Utrecht ende der vijf collegien to Utrecht ende der vijf hooftsteden des gestichts van Utrecht ende reveersbrieve dairaf sal die stat van Groninghen mit hore stat segel (besegelen). Item up dieselve tijt sal men overleveren die brieve, die dat capittel ten Doem to Utrecht ende die stat van Groninghen van der pacht des gerichts van Zeelwert malcanderen hadden gegheven. Item want die zoenlude overdragheri sin up den greve van Benthen tot enen overman, so sal mijn heere van Utrecht ende die stat van Groninghen scriven ende bidden den voirs. greven up den voirs. sinte Lucasdach to Covoirde to comen ende hem der zake, der die zoenlude nyet eens en werden, hem an to nemen te scheyden als een overman. Item solen die gevanhgen an beyden ziden quijt wesen als voirs. eer den Sonnendaghe naestcomende; ende die straet sal terstont apen wesen ellic onder den anderen te wanderen veylich mit live ende mit guede; ende als die brieve van der zoene ende van der pacht voirs. overgelevert zijn, so sal men die voirs. slote nederleggen binnen eenre maent dairnaest volgende, sonder argelist; ende hiermede solen ghesoent wesen mijn heere van Utrecht, sijn hulpere ende sijnre hulper hulpere an die een zide ende die stat van Groninghen ende die Vriezen voirs. ende al hoir hulper ende hulper hulpere an die ander syde; ende yeghelic van beyden syden sal ghesoent wesen up sijn erve ende sijn guet, als he dat nu vint ende also als dat voirs. (is), al argelist uutgeseghet in allen puncten voirs. In oirkunde des etc.
