Häuptling Edo Wimken gelobt den Hansestädten Lübeck, Bremen und Hamburg, den Vitalienbrüdern seine schützende Hand gänzlich zu entziehen und dieselben seines Gebietes zu verweisen.
Witlik sy al den jenen de dessen breff seen edder horen lesen, dat ik Ede Wymmekens hovetlinge in Rustringes verdendel bekenne unde betughe openbare in dessen breve, dat ik mid guden willen unde mid beradenen mode in guden truwen lovet hebbe unde love den erwerdighen heren borghermesteren unde rade der stede Lubeke, Bremen unde Hanborch, dat ik schal unde wille mid guden willen van my laten de vytalyenbrodere old unde iunk, de ik uppe desse tijd by my hebbe, unde de ik gheleydet hadde uppe myn slot unde in myn ghebede, (so dat ze)[*] van my rumen schaltet unde en weech teen to lande unde nicht to watere in den ersten achte daghen na ghiffte desses breves, unde ik schal unde en wille der vytalienbrodere offte nene andere vitalienbrodere unde ander lude, de den menen henseste den unde oren kopmannen schaden daen hebben edder don, de des van den steden nene sone en hebben nummermer to ewighen tyden noch husen noch heghen uppe mynen slote efte in mynem ghebede, ende en wille al sulker lude nummermer to my nemen edder nemant van myner weghen, de dorch myne wyllen doen unde laten willen. Were ok, dat ik iemande by my hedde uppe mynen slote unde in mynen ghebede, de de stede offte den kopman beschedighen wolde, den wille ik van stunden an van my laten, wan my dat to wetende wort; vortmer so wille ik dessen vorbenomden steden, orer en offte mer, beholplik wesen mid rechten truwen uppe de vitalienbrodere wan se des van my begherende sint. Ok so love ik in dessen breve, dat ik den steden unde oren kopmannen wille wedder gheven unde to den besten keren twysschen hir unde Paschen neghest tokomende alle dat ghud, dat uppe myn slot unde in mynen ghebede ghekomen is, wan id de kopmann edder en iewelik besundern mid sinen ede van my beholden, dat id in de hensestede hore. Vortmer so love ik, dat dit ghud dat uppe mynen slote edder in mynen ghebede is, dat den kopmanne nomen is, schal to hope blyven twysschen hir und Paschen, dat dar van nicht schal entferdighet werden. Alle desse vorgheschrevenen stukke unde der en iewelik besunderen love ik Ede Wymmekens vorschreven, Folkard Iayens, Nonka Durens, Lubbe Sibitis, iunge Dude unde Renneloff Lobbenson love wy mid Eden vorgheschreven unde Ede mid uns mit ener sam-melden hand dessen vorgheschrevenen steden in guden truwen sunder ienegherleie arghelyst steede, vast unde unvorbroken te holdende; des hebbe wy to ener merer bekantnisse unses truwen loftes vorgheschreven unse ingheseghele witliken mid beradenen mode ghehenget laten an dessen breff, unde wy iunker Kersten van der gnade Goddes greve to Oldenborch, Hughe van Schaghen unde Rembert Mule knapen bekennen unde betughet in dessen breve, dat wy in alle dessen vorgheschrevenen deghedingen ghewesen hebbet unde hebbet dit ghedeghedinget hulpen umme orer beyde bede willen; dat alle desse vorgheschrevenen stukke aldus sind, des hebbe wy unse ingheseghele mid dessen vorgheschrevenen ingheseghelen witliken ghehenget laten an dessen breff, de gheven is na Goddes bort dusent drehundert in deme achte unde neghentighesten iare, in deme hilghen daghe sunte Olrikes des hilghen bischoppes.
x
| Editionen |
E. Friedländer, Ostfriesisches Urkundenbuch I (Emden 1878), nr. 165 |
