| Nummer:oub0176 | Datum:Emden, 19. Juni 1400 | Überlieferung:Editie | Fundstelle:Ostfriesisches Urkundenbuch, I, S. 150, nr. 176 |
Propst Hisko von Emden verpflichtet sich, das ihm von den Städten Lübeck , Hamburg, Deventer und Kampen anvertraute Schloss Larrelt zu bewahren und damit nach dem Willen der genannten Städte zu verfahren.
Witlik sy alle den ghenen, de dessen bref sen edder huren lesen, dat ik Hisseke, provest, hovetling to Emeden, bekenne unde do witlik in dessem openen breve, dat my gheantwerdet hebbet de hovetlude van den steden, van Lubeke her Henning van Rintelen, her Iohan Krispin, van Hamborch her Alberd Schrege, her Iohan Nanne, van Deventer Hessel Overenk, van Kampen Everd Goswins sone unde Titeke Rover, de uppe desse tid to Emede sint, en slot dat Hlerlete, dat ik wille unde schal holden to der stede behof uppe myne eghene koste, unde love, dat dar nemande schade af schen en schal, dat wedder de stede sy.Dit vorserevene slot wille ik holden to truwer (hant) den vorscrevenen steden, so lange dat my de rad van Lubeke unde de rad van Hamborch schriven, weme ik dat antwerden schal, hel edder tobroken, edder oren willen dar umme to makene. Welleken under dessen dren, dat se my schriven, dat wille ik gherne don bynnen den ersten ver daghen darna, alse my ore breve komen. Dit love ik bi truwen unde by eren vor my unde vor myne erven stede unde vast to holdene. Unde wy Leward van Emeden, hovetling to Norden, unde Ede Wymmeken, hovetling in Rustringes verdendel, loven mid unsen erven mid Hisseken vorghescreven unde mid sinen erven mit ener samden haut, dat id io schal holden werden, alse vorscreven steit, den vorscrevenen steden stede unde vast to holdene by truwen unde by eren sunder ienegherlege list unde hulperede. Unde wy Hisseke, Leward unde Ede vorscreven hebbet des to tuchnisse unse ingheseghele witliken henget laten an dessen bref, de gheven unde schreven is to Emeden, in deme verteynhundersten iare, des sunnavendes na unses Heren licham daghe.
