Meinard Rusche und seine Söhne verkaufen vor ihrem Richter, dem Grafen von Oldenburg, an den Pfarrer zu Aurich und seine Söhne ein Stück Land zu Aschhausen bei Zwischenahn für 67½ Brem. Mark, und versprechen Gewährleistung.

Wy Mauricius[*] van Godes gnaden greve to Oldenburg, bekennet unde betuoghet openbare vor al den ghennen de dessen breeff zeet offte lezen hored, dat vor uns . . . ghewesen hebbet Meynard Ruossche, Robeken zone, vor[*] Alike syn echte huosvrowe, Robeke, Johan unde Meynard, erer twyger echte zones, unde bekanden openbare, dat ze myt guoden willen, myt vuolborde[*] al erer rechten erven unde al derghenner, de van rechte ere vulbort dar to gheven scholet, hebbet vorcoft unde laten vorcopet to enen steden vasten ewighen ervecope, unde latet in de were[*] in dessen breve deme eraftigen manne, herrn Johanne[*] nuo to tyden kercheren to Aurikehove[*], Lubbertuoze, Volkarduoze, Tydericuoze, Johanneze, synen kynderen[*], unde desses breves holdere myt hern Johannes willen vorscr. eyn stucke erves unde guodes gheleghen tho Asschehuosen[*], in deme kerspele to Twysschenan[*], dat nuo to tyden telet[*], buowed ende uppewoned Hinrik Hotyngh unde syn moder, myt ackere, buowet unde anebuowet[*], myt holte, myt heyde, myt wysschen, myt weyde, myt allen luoden, boren unde aneboren, de van eghendommes weghene darto horet myt aller rechten tobehoringhe unde myt aller slachtenuot[*], grotes unde cleynes, vor achte unde zestighehalve Bremische mark, also de to Bremen upper wessele an tale unde an monthe ghinge unde gheve synt, de den vorbenomeden vorcopers degher unde al wal to willen betalet synt, also ze zulven vor uns bekanden. Vortmer zo hebbet an unsser yeghenwardicheyt Meynard Ruossche, Robeken zone, vor Alyke syn echte huosvrowe, Robeke, Johan ende Meynard erer twyger echten zones, Herman Ruossche unde Meynard Ruossche, Johannes zone, knapen, ghelovet unde lovet mit samender hand in guoden truowen in dessen breve hern Johanne nuo to tyden kercheren to Aurikehove, Lubbertuze, Volkarduze, Tydericuze, Johanneze, synen kynderen unde desses breves holdere mit her Johannes willen, des vorbenomden stuecke erves ende guodes mit syner tobehoringe also vorscr. steyt, stede, rechte, vaste, vullenkommene unde unvorbrokene warschop[*] tho lestene unde to done, wanne, war, wo vakene unde welke tyt en des behoff is, unde ze ofte erer eyn dat van en esschet offte esschen latet suonder jenigherhande argheliist. Na den dat desse vorscr. cop, latinge unde loffte der warschop vor uns Mauriciuze, greven vorbenomd, alzo vor enen rechten richtere gheschen is, zo hebbe wy umme bede willen van beyder tziit unsse inghezegel myt Meynardes Ruosschen, Robeken zone, Robeken, Johannes unde Meynardes syner zones, Hermans Ruoschen unde Meynardes Russchen, Johannes zone, knapen, inghezeghelen des to tuoghe unde to ener mereren bekantnisse witliken unde openbare han[*] laten to dessen breve. Datum anno Domini M^oCCCC^o secundo, in die beati Marci confessoris.

x

x

Bestand	Ostfriesisches Urkundenbuch, I
Fol. Nr.	S. 160
Nr	189
Olim	Nach dem Orig. im Grossherz. Archive zu Oldenburg.
Jahr	1402
Datumcode	Marci

x

x

Kommentar	Von den angehängten Siegeln ist das des Grafen in rothem Wachse gut erhalten, es zeigt das Oldenburgische Wappenschild: zwei Querbalken, von den 6 Siegeln der Familie Rusche sind Nr. 3-6 noch vorhanden, sie sind aus grünem Wachse und enthalten ein quergetheiltes Wappenschild, oben zwei fünfblättrige Rosen (Ruschen?), unten einen Turnierkragen mit fünf Lätzen.

x

Material	papier

x

Editionen	E. Friedländer, Ostfriesisches Urkundenbuch I (Emden 1878), nr. 189