| Nummer:oub0213 | Datum:24. Mai 1408 | Überlieferung:Editie | Fundstelle:Ostfriesisches Urkundenbuch, I, S. 176, nr. 213 |
Bürgermeister und Roth von Groningen und die Richter der Umlande schliessen Frieden mit Keno tom Brok, seinen Landen und seinen Untersassen, unter Vorbehalt ihres Verhältnisses zu den Hansestädten und der dem Rathe von Groningen in Verbindung mit dem Bischof von Utrecht übertragenen Entscheidung des Zwistes zwischen Keno und den Städten Lübeck und Hamburg.
Wy borgermester unde rad van Groningen ende rechters van Hunsegelant, van Fivelgelant, van Reyderlande ende van den Oldeampte don kundich allen luden met desen openen brieve, dat wy umme gonste, vrienscap ende endrachticheid to holden met Kenen, hovetlinch to Broke etc., ende mit sinen landen ende undersaten hir na ghenaemt, alse Brocmerlande, Aurikerlande. Moermerlande, Lengerlande, Harlingerlande, Oestringerlande, mit sinen undersaten in Emesarlande unde met alle den genen, de umme sinen willen don ende laten willen, sint verdrageu alsodaner puncten unde vorworden als hirna gescreven stan. In den ersten sint wy vordragen, dat wy hebben gelovet Kenen vorgescreven, dat alle de ghene, de in sinen vorscrevenen landen geseten sint, ende de under sinen geboden stan ende alle sine undersaten mogen velich vorsoken met horen gude oer kopenscop to donde, unse stad van Groninge ende unse land van Hunsige, Fivelge, Oldeampt ende Reyderlant vorgescreven also dicke, als hem des genoghet, velich hoere lives ende gudes to varen ende to keren, dar sy to done hebben to water ende to lande vor uns, vor unse undersaten ende vor alle de ghene, de dor unsen willen don ende laten willen. Vort so sie en jewelich to, dat an beyden syden, wen hy sin gud to borge do, dar en sal men anders nemant umme behinderen noch umme bekummeren, dan den rechtschuldigen. Vortmer wert sake dat uns van Kenen of van sinen undersaten of van den ghenen, de in sinen vorgescrevenen landen wonaftich weren, clage vorqueme over de rechtschuldigen, de hem schuldich weren van unsen borgeren binnen Groninghen of van den ghenen, de in unsen landen wonaftich weren, den sullen wy ende willen unvertoget don ende helpen, so vele als unse stadrecht ende landrecht wiset, ende dat sullen sie vorvolgen van den rechters in den landen vorscreven, dar de schuld gelegen is. Ende en dorste off en wolde hem de rechter in den lande dan negheens rechtes helpen na landrechte, so solden sy dat claghen in der stad in des landes werve ende so sullen hem de lande ende wy helpen also vele, als en landrecht wiset, unvortoget. Item worde jenich man ut Kenen lande vorscreven off van sinen undersaten gevangen, misdan, behindert of berovet in den vorscrevenen landen, dar men ghene witlike schuld mit rechte up to secgene en hadde, dar wille wi mit malk anderen to helpen, dat de vanghene quyd worde, ende em sin gud wedder worde; ende is hem misdan, dat hem dat gebetert worde na unser macht, als dat an uns vorsocht ende beclaget is, sonder argelist. Item wert sake dat jenich man misdede in unser stad of in den vir landen vorscreven, den wy birechten wolden na landrechte of na stadrechte umme sine misdat, ende de uns entvloge onder Kenen of in sinen landen vorscreven, off wor he des macht hebben mochte umme sinen willen to don ende to laten, den dar nicht to entholdene up unse quadeste sonder argelist. Item worde dar jenich twidracht ofte schelinge by Oste der Emese tuschen Kenen ende sine vriende an de ene syd, ende Hisseken, provest to Emeden, ende sine vrienden an de ander zyt, dat God vorbeden mote, des Hisseke ende syne vriend nicht likes ende rechtes by uns bliven en wolden, so sullen dc vorscrevenen lande ende wij al unvorbonden wesen to Hisseken, hem negene helpe to don tegen Kenen ende sinen vrienden, ende wy sullen al effen guden vrende bliven mit Kenen ende sinen vrenden, ende dessen breff in siner macht al unvorbroken to holden. Item so sal Ayleke Onsta ende sine broders ende de ghene, de van Kenen vrienden in der vede[*] buten landes gewesen hebbe, als die benaemt sint in den soenbreven, een jewelich weder up sine arve ende up sin gud, als hy dat vint, ende dat vry ende umbehindert bruken sunder antuoch, ende Ayleke vorscreven schal bruken sine rechtscop ende rechtinge na utwisinge dar sien breve, de bevoren dessen breve darup gemaket ende bezegelt sint, dar he recht to hevet um Kenen bede willen, ende se sullen sune geneten unde nicht untgelden sunder argelist. Item wert sake dat de Henstede soken wolden de Vitalier off reysen wolden up de gene, de se aldus lange untholden hebben ende nuo der tyt untholdet, ende wy van Groningen worden dar to esschet ende gemant mit rechte den steden hulpe ende volge darup to done, ende wij dat deden, dar en sal sich Kene nicht mede beweren, ende dese bref sal dar mede bliven unvorbroken tusschen uns unde Kenen, sinen landen ende undersaten, ende unse vrienscop allike vast beholden der ansprake, de Kene mit rechte spreken mach up de twe stede Lubeke unde Hamborch, des hy sins rechtes ende ansprake gebleven in ende bliven wil by den biscop van Utrecht ende by der stad van Groningen. Item wer gemant van dessen vier Ummelande vorscreven, de dessen breff nicht mede vollenteen ende bezegelen wolden, de blive dar enbuten ende sta sines sulves eventure, ende dar sal desse breff allike vast umme bliven ende unvorbroken. Alle desse vorscrevenen punten, artikele ende wort ende en jewelich sonderlinge, de hebben wij borgermestere ende rad in Groninge ende wij rechters van Honsegeland ende Fivelgeland, van den Oldeampte ende van Reyderland gelovet ende lovet de in guden truwen in dessen breve Kenen, hovedingh to Broke, ende alle den ghenen, de in sinen vorscrevenen landen geseten ende wonaftich sint, ende alle sinen undersaten ende den ghenen, de umme sinen willen don unde laten willen, stede vast ende unvorbroken to holden vier ende twintich jaren naest to komende na datum dessen breves sonder alle argelist. In orkunde der warheid so hebbe wij borgermestere unde rad vorscreven unser stadsegel, ende wy rechters van Fivelgeland, van Oldeampte ende van Reyderland unser landsegele, ende wy rechters van den Halven ampte ende van den Oesterampte van Honsegeland[*] unse amptegesegele, dar uns rechters van der Merne ende van Middoger ampte to desser tyd an genoget, want wy neghene landes segele en hebben, an dessen breff gehangen. Ghegeven in den jaren uns Heren dusent verhundert ende achte, in die ascencionis Domini.
