| Nummer:oub0216 | Datum:6. April 1409 | Überlieferung:Editie | Fundstelle:Ostfriesisches Urkundenbuch, I, S. 183, nr. 216 |
Die Pfarrer von Etzel und Bant schlichten einen Streit zwischen Gereke Onneken und Naneke Diurken und seiner Frau Himka durch Stiftung einer Heirath zwischen den Kindern der Parteien.
Kundich witlik unde oppenbar sy allen den gennen, dar dessen breff schullen zen offte horen lesen, so alse de twydracht unde unwille, was wesende twischen den ersamen manne Gereke Onneken unde sine vrunde uppe ene syden, unde Naneke Dyurken unde Hymke siner husvruwen unde eren vrunden uppe de anderen zyden, umme de ervegude gelegen to Godensen[*] etc., so byn ik her Tante, kerkhere to Etezel[*] bekant vor alezweme in dessen oppenen breve, dat ik unde her Johan kerkhere in der Bantte[*] dar twischen wurven[*] unde in eyn gut vast bestant brachten, dat sodane gude lude vorben. mochten to rusten unde to vreden komen umme de vorscr. ervegudere etc. Int erste so wart dar so vorramet[*] myt alle eren vrunden van beyden ziden unde van anders guden luden, so dat des vorbenanten Gereken dochter schulde nemen den ergenanten Naneken unde Hymken sone to ener echten rechten husvruwen, unde dar mede so schulde Naneke unde Hymke syn husvruwe unde ere son unde alle ere rechten erven nakomelingen to ewigen tiden myt des vorscreven Gereken dochter hebben alle de ervegude, dar Gereken tobehoren, dar gelegen weren to Godensen, dar se umme schellaftich[*] weren, unde de to ewigen tyden to bruekende, unde desgeliken so schal de vorben. Gereke, he unde alle sine rechten erven nacomelinge to ewigen tiden wedderumme hebben alle de ervegudere, dar gelegen sint to Etczel, dat des vorben. Naneken, Hymken unde eren rechten erven wedder tobehoret, gast unde marsk, [*] unde de to ewygen tiden wedderumme to bruckende, unde hirmede so schal gelegerden unde scheden wesen alle unwille unde twidracht, dar is gewesen twischen den ergenanten Gereken unde sinen vrunden unde erven to ewigen tiden uppe de enen siden unde des vorbenanten Naneken, Hymken unde eren erven to ewigen tiden uppe de anderen ziden umme allen schel den se underlanges hebben haet. Dessen to tuge unde merer warheyt so hebbe ik her Tante vorscreven myn ingesegel witliken hangen gheheten an dat spacium dessen breves, dar schreven unde geven is ame hilgen avende to Paschen, in deme jare dusent verhundert ame negenden jare.
