| Nummer:oub0230 | Datum:24. Juni 1412 | Überlieferung:Editie | Fundstelle:Ostfriesisches Urkundenbuch, I, S. 191, nr. 230 |
Keno tom Brok pachtet von dem Erzbischofe zu Bremen den Zehnten zu Arle, Nesse und Hage und bekundet die näheren Bedingungen (Vgl. Nr. oub0263)
Ik Kene to Broke unde Awerke etc. hoffling bekenne unde betughe openbaer in desser jeghewerdighen scrifft, dat ik hebbe affgekofft den erwerdighen in Gode vadere unde heren heren Johanne, ersebischope der kercken to Bremen myt vulboert unde willen der erbaren heren Godschalkes deken unde capittels darzolves, vor twe hundert Rinsche gulden, de ik em degher unde al wal betalet hebbe, de tegheden to Erle, [*] to Nesse unde to Haghen, groet unde luttik, myt all eren rechte unde tobehoringe, alzo de van olden tyden to dem stichte van Bremen hebben ghehoert, de ik schal boren[*] unde bruken myt aller nuot unde tobehoringe, alzo vorscr. is myne lifftucht; wanneer myr aver to kort wert, unde ik vorkomen byn, zo scholen myne kindere offte myne neghesten erven derzolven tegheden bruken eyn gans jaer na mynen dode zunder der vorscr. ersebischopes, dekens unde capittels hinder unde wedersprake; konnet den myne kindere offte erven zik myt en umme de vorscr. tegheden vorghan unde vordreghen, des willen zee zunderlinx eer gunst an en keren; ok schal ik unde wil des scholemesters van Bremen officiall unde denre entfaen unde holden to Erle van den zolven tegheden alleyne wan zee dar zeende[*] halden, alzo bet an desse tijd zeede unde wonheit hefft gewesen. Des ik tot eyner betuginge myn secret hebbe witliken gehangen heten an dessen breff, de gegheven unde screven is na Godes boert duzent veerhundert unde in den tweffesten jare, up zunte Johans daghe baptisten.
x
| Bestand | Ostfriesisches Urkundenbuch, I |
|---|---|
| Fol. Nr. | S. 191 |
| Nr | 230 |
| Olim | Nach dem Orig. Kirche zu Arle Urk. Nr. 2. Gedr. Suur, Klöster S. 145. |
| Jahr | 1412 |
| Datumcode | NatJoh |