| Nummer:oub0273 | Datum:Hindelopen, 27. Mai 1420 | Überlieferung:Editie | Fundstelle:Ostfriesisches Urkundenbuch, I, S. 234, nr. 273 |
Der Abt von Ludingakerk bekundet, dass er sich mit Ocko, Groningen und den Umlanden vertragen habe.
Wy Oedze bij der ghenade Goeds van Ludynghekerke[*]der oerden van sonte Augustinus, die kelnaers, rade ende der meene meente des coventis voirscr. bekennen ende betughen mid dessen openen brieve, dat wij voir ons ende onse nacomelingen vreendelijc verdraghen ziin mid den eerzamen Ocken van den Broeke ende mit sinen onderzaten, mit den borghermeysteren, rade ende ghemeente in Gronynghen, mit den praelaten, hoefdinghen, rechters, ende ghemeente in Hunzeghe, Fivelghe, Fredewolt, Langwolt, Hummerze landen, dat wij hem ghegheven hebben enen ewighe stede vaste zoene to holden toe ewighen daghen to van aller schelinghe, die wij mit hem ghehat hebben voir dessen daghe to datum des brieffs, ende loven mede, dat wij in onzen convent noch uthove, noch in onze ghebede ghene ballinghe ut Oestfreeslant noch ut Gronyngen noch ut den Ommelanden dar ommetrend ghenen man ontholden en sullen, de den voirscr. Ocken, zinen onderzaten, der stad van Gronyngen ende den voirscr. landen dar ommetrend voirscr. hinderen noch scaden moghen noch en sullen. Ende loven oec mede, dat wij hare vianden nicht helpen noch sterken en sullen mit rade, mit dade, noch mit guede to gheven; mer loven ze te vorderen ende die zoene te holden to ewighen daghe to stede ende vaste sonder alle arghelyst. Des to enen oirconde zo hebben wij dessen brieff bezeghelt mit onsen meene coventis seghel, ende om meerre vastigheit, so heb ic Oedze voirscr. oec minen zeghel an dessen brieff ghehan-gen. Ghegeven in den jair ons Heren dusent vierhondert ende twintich, to Hindelopen, des maendaghes na Pinxterdach.
