| Nummer:oub0310 | Datum:Dokkum 2. Juni 1422 | Überlieferung:Editie | Fundstelle:Ostfriesisches Urkundenbuch, I, S. 276, nr. 310 |
Die Acht Kirchspiele und das Ostbrokerland geloben, nimmermehr Vitalienbrüder und andere Seeräuber zu begünstigen.
Wy prelaten, presters, greteman, rechters unde meente van Achte kerspelen unde Ostbrokerland, maken kundich allen luden mit dessem openen breve, dat wy na desseme daghe na ghifte desses breves nummermeer schullen edder en willen to ewighen tiiden nene Vyttallienbrodere edder andere rovere, de den kopman beschedigen edder beschedighen laten to lande edder to watere husen edder heghen in unseme lande eft ghebede. Were dat yt yement dede, so wille wy unde sollen, mit rade unde mit dade, mit alle unser macht darto helpen unde volghen to lande unde to watere, dat de vorscreven rovere vorstored werden. Ok sulle wy unde willen, dat alle coplude sullen velich unde vry varen unde keren to lande unde to watere by daghe unde by nacht, wan yd eme beqweme ys. Ok sullen alle de breve, de den menen henzesteden anroren edder ene stad bysunder, by erer macht blyven unde unvorbroken. Dit hebben ghedeghedinghed Vocko Ukena[*] hoftlingh to Lere, Wibet van Stedesdorp, [*] Dytmer Reyners, Hinrik Beyers, Otte Caland, borghermestere unde radmanne to Gronynghe unde Okke van Locwerde.[*] To orkunde unde to merer tuchnisse so hebbe wy Achte kerspele unde Ostbrokerland mit gantzeme guden willen unser land ingheseghel hanghen laten an dessen breff. Ghegheven to Dokkem in dat jar unses Heren dusent veerhundert in dem twe unde twyntigesten jaren, des dynxdages in den Pinxsten.
