| Nummer:oub0311 | Datum:Den Haag, 15 Juni 1422 | Überlieferung:Editie | Fundstelle:Ostfriesisches Urkundenbuch, I, S. 277, nr. 311 |
Herzog Johann von Baiern sendet zu Sicko Siarda und erbittet Bericht über den Zustand in Ostfriesland.
Hertoge Johan enz. Lieve ende gemynde, wy hebben verstaen, dat onse lant in Oistvrieslant boven der zoenen, die ons gegeven is van Ocko van den Broeck ende van die van Groeningen, van Hamburch ende van hoeren vrienden, ende oic sunderlinge van den Vetcoperen, zeer vernielt, [*] verderft ende gescandaleert werdt mit slaen, vaen, roven ende branden, dat ons zeer verdrietlic is, ende mit allen ernste ende onsen besten vermogen geerne verhoeden souden, dat's niet meer en gesciede, nu wy der veeden van Utrecht ontledicht, ende ontslagen syn. Ende hierom senden wy by u onsen geminden Jacob Ysebrants zoon, brenger s' briefs, om alle 't gestant van den lande te weten, ende te vernemen ende ons dat clairlic by te brengen om ons dair na te richten. Ende begeren dair om vrientlic an u, dat ghy van alle, dat ons ende onsen lande aldair antreffende ende roerende is, ons clairlic overscryven wilt, ende laten weten by Jacob voirscr. ende oic mede, of ghy ende uwe vriende belegen of scarpelic belast worden, hoe ende in wat maten wy u best verlichten ende te hulpen souden comen. Ende oic dair toe mede, wair toe dat wy ons tot u ende uwen vrienden verlaten sullen mogen, want wy in nyement meer betrouwen en hebben in den lande aldair das in u, so wy dat tot noch toe an u bevonden, ende gewair syn worden ende hierin also doen, als wy u dez ummer toegetruwen. God sy mit u. Gescreven in den Hage, XV dage in Junio (anno XXII).
