| Nummer:oub0312 | Datum:Den Haag, 21 Juni 1422 | Überlieferung:Editie | Fundstelle:Ostfriesisches Urkundenbuch, I, S. 278, nr. 312 |
Herzog Johann von Baiern beklagt sich in einem Anwortschreiben an Ocko tom Brok über dessen Bruch des Friedensvertrages und fordert ihn zu einer Tagfahrt auf.
Hertoge Johan enz. Goede vriendt, uwen brief an ons gesant, hebben wy wael verstanden, inhoudende, dat die Vitaelge broederen uwe ondersaten gevangen hadden ende die gebracht hebben tot Enchuysen, [*] doe sy van Dochem[*] rumede, ende an ons begeert, dat wy uwe ondersaten voirscr. los ende ledich quyt wouden doen scheiden ende dat u, noch uwen vrienden noch onderseten van den Vitaelge broederen, noch van nyemande genen schade en geschiede ut onsen lande of sloten na inholden der zoenen tusschen ons ende u gemaeet, die ghy ende uwe vriende ons ende den onsen geerne meynt te holden mit meer woerden, in den selven uwen brieve begrepen. Wairop wy u weder laten weten, dat ons die zoene voirscr. tot noch toe van u ende den uwen zeer quellic[*] gehouden is, want uwe vriende mit die van Lubeke, Hoemburch ende Groeningen boven der zoene voirscr. gecomen syn in onsen lande van Oistvrieslant, ende hebben in vrientscappen ende onverwaert onse slote, als Dochem ende Ezingerzyle[*] mit crachten gewonnen nedergeworpen ende gedistrueert, dair wy ende ooc van anderen punten, die ons boven der zoene voirscr. geschiet syn van u ende den uwen, als wy wael bewysen sullen, geerne richtinge ende bescheit af hebben ende nemen souden. Ende begeren van u, dat ghy dage mit ons houden ende leysten wilt tot Amstelredamme tusschen dit ende sinte Jacobs dage naistcomende, om ons opten dage voirscr by onsen vrienden ende den uwen te doen van den gebreken, die ons boven der zoene voirscr. van u ende den uwen geschiet syn, dat ghy ons van rechts wegen ende van eren wegen sculdich syt de doen, desgelyken wy u wederomme opten selven dage doen sullen. Ende eest dat ghy dage mit ons halten wilt, als voirscr. is, so wilt ons goets tyts voir sinte Jacobs dach voirscr. enen dach teykenen, ende laten weten, am dat wy ons beschicken moegen dan onse vriende aldair by den uwen te hebben, ende dan sullen wy uwen vrienden, die mitten hoeren opter voirscr. dachvairt comen sullen, een goet, vry ende vast geleyde besenden aldair veylich te comen, te wesen, te merren ende te keren wech ende weder, sonder argelist. Ende dez uwe meyninge hier af in te doen, dez begeren wy uwe bescreven antwoerde weder te weten, dair wy ons toe verlaten ende na richten en mogen. Gescreven in den Hage, XXI dage in Junio (anno XXII).
