| Nummer:oub0339 | Datum:19. Juni 1426 | Überlieferung:Editie | Fundstelle:Ostfriesisches Urkundenbuch, I, S. 305, nr. 339 |
Focko Ukena, seine Söhne, Sibet von Rüstringen und Imelo von Grimersum, die sich unter den Schutz des Bischofs und des Stifts von Münster gestellt haben, versprechen denselben treu und hold zu sein.
Wy Focke Ukana hovetlinch to Leer, Uke, Tzye unde Ude syne echten kindere, Czybet hovetding to Rustringe und Osterge, Ymele hovetding to Grymersum und Leerlte bekennen in dessen openen breve vor uns und unse erven und anerven, so als de erwerdige in Gode vader und here, Hinrich gekorne und gestediget biscop to Munster uns to des guden sunte Pauls, syn und syns gesticktes und nacomelingen biscopen to Munster knechte und deynre entfangen hevet, [*] dat wy dem vorscr. unsen leven heren und synen gestichte bistendich und bereyt solen syn, und uns daran holden, und eme und synen lande truwe und holt to synde, syn und syns gestichtes beste to donde und syn ergeste to kerende na unser macht. Alle desse vorscr. puncte und articule unde eyn jewelik bisunderen hebbe wy gelovet und gesekert und loven und sekeren in guden truwen stede, vast und unverbroken to holdene sunder argelist. Und dess to merer bekantnisse so hebbe ick Focke vorscr. myn segele vor my, myne kindere und erven an dussen sulven breff gehangen. Und wy Czybet und Ymele vorscr. hebben dess to merrer zekerheit unse segele vor uns und unse rechte erven und anerven an dussen sulven breff gehangen. Datum anno Domini Mo CCCCo XXVIo, feria quarta post Viti martiris.
