| Nummer:oub0387 | Datum:Bevergern, 13. Juli 1430 | Überlieferung:Editie | Fundstelle:Ostfriesisches Urkundenbuch, I, S. 358, nr. 387 |
Bischof Heinrich von Münster verleiht dem Alwardus, dem Sohne des Häuptlings Imelo v. Grimersum, die Propstei zu Hinte.
Henricus Dei et apostolice sedis gracia Monasteriensis ecclesie episcopus dilecto nobis in Christo Alwardo, filio Ymelonis capitalis in Grymersum et Osterhusen, salutem in Domino sempiternam. Laudabilia probitatis et virtutum tuarum merita, quibus apud nos multiplici commendaris testimonio, nos inducunt, ut tibi ad graciam reddamur liberales. Volentes itaque tibi premissorum intuitu graciam facere specialem, preposituram in Hint, terre Frisie nostre diocesis, ad presens ad tempus (sic) vacantem, cuius collatio, provisio, presentacio seu quevis alia disposicio tociens quociens eandem vacare contigerit[*] ad nos et nostros successores dinoscitur pertinere, tibi in Dei nomine cum omnibus suis fructibus, proventibus et attinenciis universis conferimus et de eisdem providemus, investientes te per presentes, salva nobis et nostris successoribus, nostris officialibus et commissariis iuribus et iurisdiccione nostris in eadem. Iniungentes tibi ac nobis nostrisque officialibus et commissariis semper debitam et devotam obedientiam et cum ad ea per nos aut ipsos requisitus fueris, fidelitatis iuramentum prestes, personalemque residenciam in ipsa facies, alioquin dicta nostra collacio et provisio tibi facta, ut premittitur, nullius sit roboris seu momenti. Datum nostro sub sigillo in testimonium premissorum appenso, in castro nostro Bevergerne, anno Domini millesimo quadringentesimo tricesimo, die beate Margarete virginis et martyris gloriose.
