| Nummer:oub0396 | Datum:12. Jan. 1431 | Überlieferung:Editie | Fundstelle:Ostfriesisches Urkundenbuch, I, S. 367, nr. 396 |
Edzard von Greetsiel, Vormünder des Brokmerlandes, sagt allen Friesen und speziell Folckert, für den dieses Zeugniss ausgestellt wird, Schutz des Eigenthums zu.
Ick Edzard, Ennen soen, hovetling tho Gredzyl, vormunder in Broeckmerlant, do witlich und kundich allen den ghennen, dar desen brief zeen off horen lesen, na inhold der besegelde breve und vorbunt aller menen Vresen in alsulcker formen, als dat alle gude Vresen sullen besitten und bruken dat eer, dat em mit rechte boeren mach und geervet is; also sal Folckert, wiser dusses breves, besitten und bruken syn erve und gude, dat em geervet is und mit rechte thobehoert, und dat unbekummert tho holdende. Weret zake, dat em emand dar en baven vorunrechten wulde, dat sall my Edzard vorscreven unde den menen Vresen leid wesen und willen dat helpen keren war wy kunnen unde mogen, dat sy mit den armen, off mit den riken. Geschreven up twelftachtende[*] avent, under mynen segel, XXXI.[*]
