| Nummer:oub0402 | Datum:Jever, 21. Dez. 1431 | Überlieferung:Editie | Fundstelle:Ostfriesisches Urkundenbuch, I, S. 371, nr. 402 |
Der Häuptling Hayo Harlde zu Jever und Wittmund bekundet eine zwischen den Brüdern Eggo und Mamme und dem Kloster zu Östringfelde vereinbarte Sühne.
Ik Hayo Harlde to Jever, Wytmunde hovetling bekenne unde tughe openbar vor alsweme, dat ik mijt anders guden mans hebbe gudliken vorscheden den unwillen, de was twyschen Eggen unde Mammen broders van eyner zijd, unde unser leven Vrouwen to Ostringevelde, als van des hammes[*] weghen, dar se Irpe de wunden umme deden, in sulker wijse so na screven is: dat de eergenanten broders myt vryen willen unde myt wolberaden mode hebben ghegheven van erer zele zalicheijt willen unde erer vrunde den sulven ham landes, dar se myt Irpe twidrachtich umme weren unde ene wunneden unser leven Vrouwen to Ostringevelde by eren gude unde lande to blivende to ewighen tijden, de sulven broders ofte ere nakomelinge in alle tokomenen tijden dar nicht na to sprekende ofte to claghende. Over[*] desser schedinge zin mede wesen her Rikmar to Rephesholte kerckhere, Lubbo Hinkkelde, Martinus scriver to Jever unde anders vele gude mans, unde is scheden unde utesproken to Jever to Innike Haijken[*] huse. Des to groter tuchnisse der warheit hebbe ik Hayo hovetling vorscr. myn ingesegel witlike hangen heten to dessen breve. Gheven na der bort Christi verteynhundert in dem en unde deertighesten jare, am hilgen daghe Thome des hilgen apostels.
