| Nummer:oub0428 | Datum:25. Juni 1434 | Überlieferung:Editie | Fundstelle:Ostfriesisches Urkundenbuch, I, S. 392, nr. 428 |
Vertrag zwischen dem Bunde der Ostfriesen und Hima Itzinga über ihren Güterbesitz, die Rücklieferung der von Aurich nach Norden gebrachten Sachen des Ocko tom Brok ausser seinen Gewehren, über die Kenenburg, die Schleifung eines Theiles der Neuen Burg zu Norden, über freien Abzug der Besatzung auf der Alten Burg zu Norden u. A. m.
Ihn den namen Gotes. Amen. Witlich, kundich und apenbaer sy allen froemen luiden, de dussen brieff sehen, hoeren offte hoeren lesen, dat wy gemeene Freuen ihn Oistfrieslandt hebben gededinget und beslaten enen guiden, steden, vasten frede mit der erbaren fruw Himen Itzingha und Frerick oren broeder in alsodanen beschede und vorworde, dat fruw Himba schall beholden by sick und gebruiken alle ore erven und guidt, bewechlich und unbewechlich, dat or van rechte angearvet iss, gegeven offte gekofft, offte enen anderen arffgenamen van rechte broeken, idt sy gelegen waer dat gelegen sy, waer wen arffegenamen mit unrecht van twintich jaeren ahn wente tho dusser tidt dar well over clagede, des schulde fruw Hyme bliven by een lantrecht; darmede schall fruw Hirne entslagen wesen aller clage, fry und quidt wesen aller ansprake van olden tichtigen broeke, hilligen und ander saeken, idt sy gescheen wat dar gescheen sy, by oren tyden offte vor oren tyden. Ock so schall fruwe Hymen wedergeven den erbaren juncker Ocken by enen swaeren eede alle syn guidt, dat van Aurick tho Norden up de borch wurt gebroecht, behalven syne bussen, de nimpt de gemeenheit mit den anderen bussen. Ock schall fruw Hyme overantworden de twe dele alle orer bussen, pile und bussenkruit[*] und dat ander beholden tho eres sulves behoeff. Weert dat jemant ansprake doen wulde up de Kinenborch, so scholde fruw Hime bliven by een[*] landtrecht; doich schall men dale storten dat steenhuiss und de Noerdersydt van der Nienborch. Ock schall fruw Himbe umme aller gemeene Fresen beste, up dat gene Fresen schaden geschee van orer borch, so schall se uthevenen[*] laten de Noerdersidt van orer borch, und verder uthslichten dat boellwerck van der vorborch, und darmede schall fruw Himba gelick bliven allen Fresen. Ock scholen de Broeckmers ore hilligen weder entfangen, so se nhu tho der tidt sinnen. Ock scholen alle de gesellen van Fresen und Duitschen, de ihn dusser vede hebben gewesen up de Oldeborch tho Norden fiy und velich lives und guides wesen, wanen und trecken, waer one des gelevet, beholden und bruiken ore guidt, waer se dat hebben, so se dat vinden und untfangen, und aller claege van allen saeken so gescheen sint, entslagen wesen. Dusse articulen und puncten thovoeren uthbescheden, so schall fruw Himen borch staende bliven ihn all ore heerlicheit, so se dan iss. Weert ock saeke, dat jemant ihn Oistfrieslandt de hoevetlinge ihm lande und de huisluide fruw Himben und Frerick oren broeder vorder gruntlichen vorderven wulden, und er hirbaven over den haels vallen mit unrecht, dat scholen unde willen helpen keren alle de lande und hoevetlingen, de mit allen gemenen Fresen ihn vorbunde sinnen, mit live und mit guide, by dage und by nachte, so vaken one des bedarff iss, und fruw Himbe darumme vorderinge doen, waer idt noet iss tho oren rechten tho vorhelpen. Hir an und over weren Enno hoevetlinck tho Greetzill, Wiart hoevetlinck tho Uphuisen, Hedde, Tanne Kanckena tho Witmunde, Wiptet hoevetlinck tho Esense, Hero Omken hoevetlinck tho Stedesdorpe, Edzart vormunder des Broeckmerlandes, Johan borgemeister der stadt Bremen, Schynharde droste der heerschup tho Oldenborch und Dirck Bordewyss. Ihn orkunde unde merer tuechenisse dat dusse voerscr. articulen stede und vast bliven, so hebben wy vorgeschreven hoevetlinge unse ingezegell hangen laten ahn dit spatium dusses breves. Und wy gemene inwoners ihn Overledinger, Moermer, Uplengener, Reider, Eemsiger, Broeckmer, Auriker, Oistringer, Harlinger, Norder olde und nie lande hebben alle unse ihngezegelen[*] witlichen hangen laten ahn dussen brieff, und hebben se gelavet ihn guiden truwen stede und vast tho holden sunder argelist, und wy Ciptet (so) Allena, Bette Hinkena, mester Anke, Tirlinck Addinga, Iwe Siberna, Boye Hillersna, Haie Krulle, junge Erick und olde Erich, dusse alle hebben eendrachtelichen dusse vorgeroerte articulen ock mede stede und vast tho holden gelavet und geswaren, und fruw Himba und Frederick oren broeder und alle ore guide mans, de tho Norden up der borch sinnen gewesen, umme nenerleie saeke willen darumme tho haten, de one angekamen iss van wegen der borch tho Norden. Datum und gehandelt ihn dem jaer nha Christi geboert dusent veerhundert veer und dertich, feria sexta nha Johannis baptiste.[*]
