| Nummer:oub0466 | Datum:Ottenstein, 27. Febr. 1437 | Überlieferung:Editie | Fundstelle:Ostfriesisches Urkundenbuch, I, S. 423, nr. 466 |
Der Bischof von Münster antwortet der Stadt Hamburg auf die auf der Tagfahrt zu Oldenburg wegen des Propstes Imelo und des Schlosses Emden vereinbarten Abmachungen.
Henricus episcopus Monasteriensis. Eirsamen guden vrende. So gy uns nuo lestwerf under meer woirden geschreven hebben, [*] u eyne antworde tho laten weten van sulken bestande vermids unse und uwe vrende upp der dachfard latest tho Oldenborch berramet, hebben wy wail verstaen, und begeren u dairopp weten, als unse vrende die tho der tyd upp der dachfard tho Oldenborch geweist weren by uns qwemen und uns van sulken bestande openbarenden, so meynden wy und ander unse vrende, dat sulk lanck bestant und u beraid anders nicht en were dan eyne entlegginge unde vertoch, na den wy anders nicht begert en hebben, das tho nemen up gelegeliken unvertogeden dage, wes gy uns umb Ymelen unsen provest und diener und unsen slote Emeden van eren und reichtes weigen schuldich weren tho doen. Dairomb so bestelden wy doevore van stonden an unsen amptman in Emeslande, dat hy voirt brengen solde an uwen amptman tho Emeden, dat uns sulk bestant nicht gelegen en were also mit u tho holden, angesien dat gy uns ere und reicht zo vertrecken wolden unde ock zollike vrentschap alze unser beyder vrunden mallick myd anderen to warde wezet zint; dan moechte uns noch van u wederfaren upp gelegene geburliken unvortogeden dagen, wes gy uns umb Ymelen unsen diener und unssen slote Emeden weigen van ere und reichtes weigen plichtich weren tho doen, wolden wy gerne nemen, up dat uns dar vorder nynes unwillen umme noet en weer. Datum Ottensten, quarta feria post Reminiscere, anno XXXVII.
