| Nummer:oub0484 | Datum:1437 | Überlieferung:Editie | Fundstelle:Ostfriesisches Urkundenbuch, I, S. 435, nr. 484 |
Das Kirchspiel Leer begiebt sich unter den Schutz Hamburgs, räumt den Hamburger Amtmännern zu Emden die Gerichtsbarkeit in gewissen Fällen ein, und verspricht Naturalabgaben.
Witlik unde openbar sy allen, de dessen breff zeen ofte horen lesen, dat wy ghemeene kerspelbuere unde inwonere des kerspels to Leere uns myd vrigem willen unde wolberadenen mode hebben vordraghen, unde eendrachtliken gekoren de van Hamborgh unde den hovetman to Emeden van der van Hamborgh wegene to beschermers unde vor deghedinghes luden, also dat wy na alle unsseme vormoghe en scholen unde willen in redeliken saken underdanich unde horsam wesen ghelyk den borgheren to Emeden unde anderen eren lansten[*] unde undersaten, unde nummer teghen se jenigherleie wys to donde sunder alle arghelist. Wedderumme so scholen se uns in unsseme rechte vordeghedinghen unde vorbidden ghelyk den borgheren to Emeden unde anderen eren lansten unde undersaten vorscreven, unde wy scholen unde willen see unde de ere unde den ghemeenen copman alle tyd vorderen unde ere beste weten wor wy konen unde moghen. Unde to bekandnisse sodaner vorbiddinghe unde beschermynghe, so hebbe wy en gheschencket unde schencken en jeghenwardighen in desseme breve vere de hoghesten gerichte in unsseme kerspelle vorbenomed, nameliken dotslach, mortbrand, deverie unde frouwenkrenckend. Also weret, des God nicht en wille, dat jenich dotslach in unsseme kerspelle ofte van unssen kerspelburen edder inwoneren schude, darvan scholen se hebben to broke twelff Arnemer guldene unde nicht meer, unde de anderen dre gerichte scholen unde moghen se richten na older sede unde wonheyd des landes. Vurdermeer so schencke wy deme hovetmanne to Emeden van der van Hamborgh wegene alle jar van ener isliker ploch uthe unsseme kerspelle ene tunne haveren, unde de alle jar twisschen sunte Michaelis unde sunte Mertens daghe genstliken unde wol to willen to entrichtende unde to betalende sunder jenigherleie vortogheringe ofte insaghe. Alle desse vorscrevene stucke unde articule samentliken unde besunderen love wy ghemeenen kerspelbure unde inwonere des kerspels to Leere vorscreven den erbenomeden van Hamborgh unde den erbaren mannen her Vicken Wigershope unde her Detleff Bremere amptmannen to Emeden van der van Hamborgh wegene unde eren nakomelinghen stede vast unde unvorbroken to holdende in guden truwen sunder alle arghelist ofte jenigherleie behelpinghe. Des wy to merer tuchnisse unde groterer witlicheyd unsses kerspels ingesegel witliken unde myd guden willen vor dessen breff hebben henghed laten. Na der bord Christi veerteynhundert jar, darna in deme soven unde druttigesten jare.
