Die Häuptlinge Edzard zu Norden und Ulrich zu Esens bekunden, dass sie von den Hamburgern Schloss und Stadt Emden, nebst einer grossen Zahl anderer Ortschaften sammt deren Gerechtigkeiten und einem umfangreichen Inventare auf Schlossglauben empfangen haben.

Wy Idzerd to Norden unde Olric, desulven Idzerdes broder, to Ezense hovetlinghe bekennen openbare unde doen witlik allen, de dessen breff zeen edder horen lesen, dat wy van den erbaren unde vorsichtighen mannen, heren borghermeisteren unde radmannen to Hamborgh hebben entfanghen in guden truwen unde uppe slotloven ere slot unde stad Emeden in Oestvreslande beleghen, myd allen dessulven slotes unde stad Emeden renthen, rechticheiden, undersaten, tobehoringhen unde radschoppe, alse hyrna gescreven steyd. To deme ersten myd achteyn stighe grase landes, de to der borgh horen, beleghen in Emeder hammerke, twe unde sostich grase van Igen wegene to Dytzum, to Suderhusum beleghen, den heert to Hersweghe[*] van dordehalff hundert gresen, der men bruken mach, unde veertich grase, de woste ligghen, den heert to Lopsum van achte unde veertich demeden, den Wichhuser[*] heert van vofteyn stighe grasen, den heert to Twixlum van hundert grasen, dre grese myn; neghentich huswerve bynnen Emeden myd husen besat, unde twe woste werve, Rederdes hues van Folkerdewere, Nanno Nytardisna hues unde Bole Pibena hues bynnen Emeden, dusent unde vif unde veftich grase landes van olde Imelen to Grimessum, Wirdum, Pewesum, Osterhusen unde to Hinte beleghen, drehundert unde vif unde twintich grase van Frederike van Lerlte, beleghen to Eddelsum unde to Hinte, soes hundert grase van Frederikes moder van Lerlte to Bettewere, Uttum, Wirdum, Grimessum unde to Hinte beleghen, twehundert grase soven grase myn van Redert Benynghe, beleghen to Grotehusum unde to Dytsum, vif unde sostich grase van des vorbenomeden Rederdes vader, beleghen in Wolthuser hammerke, twehundert unde veer unde twintich grase van Rederde van Folkerdewere unde siner husfrouwen, beleghen to Borsum, Petkum, Westerhusen unde Folkerdewere. Vurdermeer dat recht der kerspelle Deteren, Holne, [*] Filtzum[*] unde Nortmore[*] van der ostersyden Habbe Bawinghesborgh, unde darto islikes jares uthe eneme eliken huse in dessen vorscr. kerspelen ene tunnen haveren; dat recht to Nortmore van deme westerende, to Loghe, [*] Loghebeerne, [*] Leere, Uttermore, [*] Eynrsnahusen, [*] Bollinghusen, Velde, [*] in Eddermore, [*] Faenhusen[*] unde tor Nygenborgh, unde darto van ener jeweliken ploch islikes jares ene tunnen haveren; dat recht to Hatzehusen, [*] Folkerdeborgh, Burghum, [*] Rarechum, Aylingkwolde[*] unde ter Gast;[*] in Overledingherlande dat recht to Poptishusen, [*] Stikhusen, [*] Oldehove, [*] Nigenborgh, [*] Hilkenborgh, [*] Torneborgh, [*] Uringhergast[*] unde Holtgast; darto scholen de vorbenomeden van Stikhusen, Oldehove, Nigenborgh, Hilkenborgh, Torneborgh, Uringhergast unde Holtgast islikes jares uthe eneme isliken huse gheven ene tunnen ghersten; in Reyderlande dat recht van Wenyngherghate wente to Reyde, unde in Emesingherlande dat recht to Lerlte, Twixlum, Langhene, Wivelsum, Folkerdewere, Kanynghum, Frebesum, [*] Woltseten, Mydlum, Westerhusen, Osterhusen, Suderhusen, Kanynghusen, Esinghusen unde Lopsum, unde myd dessen tobehoringhen unde radschoppe achte smale tunnen vul pyle, veer smale tunnen vul bussenkrudes, ene grote kamerbussen myd twen kameren myd sos unde tachtentich stenen, twe grote bussen, de ene myd twen reghen bokstaven, unde de anderen, dar steyd juncher Ocken wapene up, myd veer unde tachtentich stenen to hope, enen vogheler achter deme sale, dar juncher Ocken wapene uppe steyd myd tachtentich stenen, twe yserne loedbussen myd eren loden, enen ysernen vogheler in deme holte, twe kamerbussen myd sos kameren, ene kopperen kamerbussen myd ener kameren, enen klenen kopperen vogheler, twe unde dortich bedde, dar dre grote bedde mede sind myd Hollandeschen buren, unde de anderen sind klene bedde myd linenen buren, achte unde twintich beddepoele, neghenteyn paer knechtelaken van twen schroden, enen praem myd siner tobehoringhe, twe yserne bolten, vif heelden, dre helden slote, soes grote grapen, vif klene grapen, twe grote ketelle, enen myddelmateschen ketel, enen eensleghelingk van eneme ammer waters, enen ketel in deme bakhues, enen braetschapen, ene rosten, dre ketelhaken, soven tunnen vul soltes, dre bruwvate, een handvat, twe langhe bankpole, twe korte banckpole, een trisoer, ene klene voldetafelen, ene rode kisten, ene tunnen bottere, hundert tunnen Hamborgher beers, twintich smale tunnen rogghen, veer unde dertich smale tunnen vul meels, dorteyn melke koye, twe winden to den armborsten unde ene windmolen myd erer tobehoringhe vor der borgh; unde alle undersaten, renthe, rechticheide, radschop unde tobehoringhe des vorbenomeden slotes unde stad Emeden, alse vorscreven is, schole wy unde willen den vorscrevenen borghermeisteren unde radmannen der stad Hamborgh, eren nakomelinghen unde der stad Hamborgh to truwer hand vorstaen unde vorwaren unde en ofte eren nakomelinghen de unvormynnert, wan wy van en ofte eren nakomelinghen darto gheessched werden, sunder insage genstliken wedder antworden, alse wy dat van en entfanghen hebben na inneholde unde uthwisinghe unsses hovetbreves, den wy en darup ghegheven unde besegelt hebben. Ok en schole wy unde willen der renthe, rechticheiden, tobehoringhe unde radschop der vorbenomeden slot unde stad Emeden nenerleye wys vorkrencken, vorpanden, vorsetten ofte anderer wys van der hand bringhen, id en sche myd willen unde vulbord der vorscrevenen borghermeistere unde radmanne der stad Hamborgh ofte erer nakomelinghe; vellet ok wanneer, dat jenich ballinghe, der wy siner erve unde gudere to deme stote unde stad Emeden van der van Hamborgh wegen bruken unde hebben, myd uns insonen wolde, also dat he des sinen sulven bruken unde besitten mochte, des en scholen unde willen wy nicht doen ofte mechtich wesen buten rade unde willen der vorscrevenen borghermeistere unde radmanne to Hamborgh ofte erer nakomelinghe. Alle desse vorscr. stucke unde articule samentliken unde besunderen love wy Idzerd und Olric brodere vor uns unde unsse erven den erbenomeden borghermeisteren unde radmannen to Hamborgh, eren nakomelinghen unde der stad Hamborgh stede, vast unde unvorbroken to holdende in guden truwen sunder alle list ofte jenigherleie behelpinghe jenighes geystlikes ofte werldlikes rechtes. Unde des to merer tuchnisse unde groterer witlicheyd, so hebbe wy Idzerd unde Olric vorbenomed unsse rechten ingesegele witliken unde myd gudem willen vor dessen breff henghed laten. Na der bord Cristi veerteynhundert jaer, darna in deme neghen und druttigesten jare, am dinghesdaghe negest na sunte Jacobi daghe des hillighen apostels.

x

x

Bestand	Ostfriesisches Urkundenbuch, I
Fol. Nr.	S. 452
Nr	509
Olim	Orig. im Archive zu Hamburg.
Jahr	1439
Datumcode	MpJacobi

x

x

Kommentar	Die Siegel sind erhalten: 1. Wappenschild mit Harpyie und 4 sechsstrahligen Sternen, Helm mit Lilie. S. idzerdi capitalis in Norda. 2. Wappenschild mit Harpyie. Helm mit Lilie. S. Ulrici de . . . . .(unleserlich, vielleicht Greetsiel) capitalis in Esense.

x

Material	papier

x

Editionen	E. Friedländer, Ostfriesisches Urkundenbuch I (Emden 1878), nr. 509