| Nummer:oub0528 | Datum:30. Sept. 1441 | Überlieferung:Editie | Fundstelle:Ostfriesisches Urkundenbuch, I, S. 468, nr. 528 |
Schutzund Trutzbündniss, insonderheit zur Aufrechthaltung ihres Besitzstandes, zwischen einer Reihe Ostfriesischer Häuptlinge.
Wy Brunger tho Broke, Sibrant tho Loquart, Tide tho Plegeweert hoevetlingen etc, van den enen siden, und Imell tho Oisterhuisen, Ailt Beeningha tho Grimersum pravest tho Hinte, Frederick tho Larrelte, Redert Beeningha tho Huisum, Tamme tho Petkum hoevetlingen etc. ahn der ander sidt, doen witlich und kundich allen ersamen guiden fromen luiden, de dussen brieff sehen oder hoeren lesen, wo dat wy vorgeschreven personen und hoevetlingen hebben uns voreniget und befrunschupet, vordragen und vorhanden tho ewigen dagen mit mellcanderen ihn aldussdaniger manieren, als hirnha beschreven steit: dat wy vorscr. hoevetlingen een ider de ene dem ander bystandich tho wesen, syne heerlicheit, arve unde guider tho gebruiken, war de gelegen synnen, mit live und mit guide, waer des tho doende iss, behalven de heerlicheit ihn Broeckmerlandt und Aurickerlandt, de juncker Keno guider gedechtenisse gebruiket hefft und thobehoerde; des staen wy Imele, Ailt unde Frederik vorgescr. tho, und schelden quidt Brunger, Sibrant und oren arven. Ock so scholen und willen wy alle vorscr. hoevetlinge unser geen, geen son offte frede ahngaen offte nemen buiten consent unde vulboert unser aller tegens den genen, de unse heerlicheiden, arve und guider bruikende sint mit gewalt und unrecht, und darumme ene vede offte son antoghaen mit mellcanderen. Ock so willen wy vorscr. hoevetlingen genen huissman mit unrechte avervallen und een itlich guidt huissman by dat syne willen laten bliven, und dat tho gebruiken, als ore olders one dat angearvet hebben. Alle dusse vorscr. articulen und puncten willen wy unde laven melcanderen stede und vast tho holdende sunder alle argelist und nie funde und hulperede uthgesecht. Ihn orkunde dusser waerheit und merer getuechenisse, so hebbe wy Brunger, Sibrant und Tide hoevetlinge vorscr. unse ingezegele uppet spatium dusses brieves gedrucket. Int jaer unses Heren dusent veerhundert een unde veertich, up sunte Jeronimi des hilligen leres dach.
