| Nummer:oub0556 | Datum:22. Jan. 1444 | Überlieferung:Editie | Fundstelle:Ostfriesisches Urkundenbuch, I, S. 488, nr. 556 |
Häuptling Ulrich von Norden usw. bekundet, dass Peter Meyg von Holland nach Norden übergesiedelt sei, und empfiehlt ihn und sein Schiff dem allgemeinen Schutze.
Allen erbaren vromen luden, de dessen jegenwardigen breff seen ofte horen lesen, enbede ik Olrik to Norden, Brokmerlande, Emeden, Esensen, Aureke unde Lengen etc., in Ostvreslande hovedlingk, mynen frundliken grut mid begeringe alles gudes, witlik donde unde openbare betugende in unde mid dessem breve, dat Peter Meyg unde sine kindere mid eren guderen unde woningen uth Holland to Norden in myn gebede sind gevaren, unde myne undersate geworden, so dat ik se wil unde schal beschutten, beschermen, vorbidden unde vordegedingen geliik myne andere undersate in mynen gebede wonaftich. Wurumme begere ik van juw allen denstliken biddende, dat gii den vorben. Peter Meyg, sine kinder, schep, gud unde schepeskinderen vredesam, ungelettet, ungehindert unde umbeschediged[*] varen laten; vordene ik umme juw allen unde enen jewelken bisunderen frundliken gerne allewege. In orkunde der warheid so hebbe ik Olrik vorben. myn[*] ingesegel benedden upt spacium desses breves heten drucken. Ghegeven na der bord Christi dusend veerhundert jar, daran in deme veerundeveertigesten jare, in sunte Vincencii dage des hilligen mertelers.
