| Nummer:oub0572 | Datum:28. Mai 1446 | Überlieferung:Editie | Fundstelle:Ostfriesisches Urkundenbuch, I, S. 501, nr. 572 |
Bischof Heinrich von Münster verkauft mit Zustimmung des Domkapitels der Komthurei zu Jemgum eine wiederkäufliche Rente von 75 Malter Roggen.
Wy Henrick van Morse van Godes gnaden, bisscop to Munster, bekennen und betugen in dessem apenen breve, dat wy mit willen und vulbort der erbaren unser leven andechtigen domdeckens und capittels unser kercken to Munster, heben vorkofft eynes steden vasten erffliken kopes den erbaren heren Edzerde cummeldur des convents to Gemmyngum in Vreysland, ordens sancti Johannis baptiste, und synen nakomelingen to behoff des convents vurscr. vyffundseventich molt gudes winterroggen in und uyt unses gestichtes tenden to Reden[*] ewiger rente, de men en sall wall to willen betalen alle jar unvorjaret to ewigen tyden up unser leven Frowen dach to lechtmissen, achtedage vor off na sunder argelist, und en in ere schip vor der bruggen to Reden kummerlos to leveren; und wert sake, dat em desse vyffundseventich molt roggen nicht to willen betald en worden, wo dat to queme und se desjenigen schaden kregen off darvan hedden, den schaden mit den roggen mogen se uns und den unsen luden in den kerspel to Rede und alle den ghenen, de ichtes wes vele off luttik bowen eder bruken der marcke de tenstaftich[*] is in den kerspell to Rede, he sy vry off egene, affmanen mit geistliken unde werltliken rechte, dat yd eyne den anderen nicht en hindere sunder uns, unser nakomelinge off yemendes wedersegginge. Wert sake dat desse vurscr. tende so hoh nicht streckede, so mogen so dat vormanen uyt unsen alingen guden, belegen in den kerspell to Rede, in vorworde, dat wy und unse nakomelinge mogen desse vyffundseventich molt roggen vurscr. weder kopen und losen to unses stichtes behoff alle jar unvorjart to ewigen tyden up den hilgen dach sunte Johans baptisten vor vyffteynhundert guder Rinscher gulden, de gemuntet syn vor datum desses breves, und dat geld vor den Nyenhus to leveren, und wen wy offte unse nakomelinge de lose doen willen, dat solle wy em eyn haleff jar mit unser scrifft vorkundigen laten. Ock heben wy gelovet und loven vor uns und unse nakomelinge bisschope to Munster, dat wy den erbaren cummeldur und den convent to Gemmingum vurscr. sollen vry und veylich und mit unsen geleyde halen laten und utvoren eren roggen vurscr. unbekummert und unbeswert van uns, unse nakomelinge off yemende sunder alle argelist off yenich inseggen; und heben des to tuge und bekantnisse unse grote ingesegele neden an dessen breff doen hangen. Und wy domdecken und meyne capittell der kecken to Munster vurscr. bekennen, dat dyt mit unsen willen und vulbort gescheyn in so vurscr. steyt, desses to bekantnisse so heben wy unses capittels ingesegele mit ingesegel unses gnedigen leven heren vurscr. neden an dessen breff doen hangen. In den jaren unses Heren dusent verhundert sees und vertich, des saterdages na unses Heren hemelvards dage.
