| Nummer:oub0584 | Datum:29. Sept. 1447 | Überlieferung:Editie | Fundstelle:Ostfriesisches Urkundenbuch, I, S. 511, nr. 584 |
Der Pfarrer von Jemgum und der Häuptling von Tergast schlichten einen Streit zwischen dem Convente zu Jemgum und den Brüdern Aild und Menno über Grundstücke bei Deddenborg.
Ik Conradus, kerckher to Gemmynghum, Hoyted Tammana, hovetlyng tor Gast, enkennen openbar vor allen guden luden, dat wy hebbet vorenyghet unde vordraghen den convent to, Gemmynghum by der enen syden, unde Ayld Deddens (unde) Mennen syn broder van der anderen syden, umme zodane twydracht unde unwyllen, als dat convent to Gemmynghum vorscr. hadde up Ayld ende Mennen synen broder vorscr. in desser nabescrevenen wyze. De erste artikel ys, dat de convent to Gemmynghum vorscr. schal hebben van Symdelant beleghen in Bedma hamryk, dar nu kortlyken bedyket ys, 6 vote landes. De ander artikel, dat de convent vorscr. schal hebben in dersulven hamryk vorscr. 4 vote landes by Eppeka fenne van Egtzyns weghene zelygher dechtnisse. De derde artikel, dat Hayo Melkana fenne schal wezen zo bret als men den slot vynt unde utwyzet, de dre part schal hebben dat convent, dat verde part Ayld unde Menno vorscr. We desse vorscr. schedynghe nycht en holt oft ynbreket, de schal gheven den heren van Hamborch to Emeden ofte we Emeden vorwaret vyftych Rynsche gulden, als ze zulven vorwylkoret hebbet vor uns schedesluden vorscr. Desse schedynghe stede vast unvorbroken to holden zunder jenygherhande inspreken, zo hebbe ik Conradus unde Hoyted vorscr. unse inseghele ghehanghen to dessen breve. Ghescreven in de jare unses Heren MoCCCCoXLVIIo, up sunte Michahelis dach des archeenghels.[*]
