| Nummer:oub0662 | Datum:16. Juni 1453 | Überlieferung:Editie | Fundstelle:Ostfriesisches Urkundenbuch, I, S. 578, nr. 662 |
Der Pfarrer Thyado zu Grimersum verkauft dem Häuptling Aild Beninga daselbst, Propst zu Hinte, ein Stück Erbe, das Duvelswerk bei Canhusen.
Ick her Thyado, [*] kerchere to Grimadzum, betughe jeghenwordich in kracht unde macht dusses apenen beseghelden breves vor alsweme, se synt gheestelick edder werlick, de dessen bref zeen edder horen lezen, wo ick hebbe vorkoft unde jeghenwordich vorkope deme edelen vorsichtighen Ayld Beningha, pravest to Hinte unde hovetlinge to Grimadzum, een stucke erste beleghen bii Kaninghusen, [*] gheheten Duvelswerkke, myt den hellen unde unleende, de bii unde umme den vorscreven werf synt ligghende, dat in vortyden ene grote fenne heft ghewezen, de vormyds den unwedder unde water vorghaen ys, vor enen summen gheldes, de my her Tyado vorscreven voel unde al wal betaelt ys de erste penningh myt den lesten, zo dat ick her Thyado[*] updraghe unde quitschelde disse vorscr. erve vor my unde myne rechte erve, ze synt baren edder unghebaren, unde de edele Ayld Beningha unde syne rechte erve moghen dyt vorscreven lant unde de vorbeteringe unde anwassinghe des landes ghebruken, vorhuren, vorwesselen, vorsetten edder vorkopen na eren wyllen sunder al arghelist, hulprede edder nye vonde enighes rechtes, dar men dessen breef mach mede nederlegghen. Hiir hebben an unde aver ghewezen vor tugheslude gheesket als Geeldo Sybena unde Hayo Krulle, kerspellude to Grimadzum unde ander vele goder lude. Tot merer tughnisse der waerheit, zo hebben wii her Thyado unde Ayld Beningha vorscreven ghebeden den erbaren vorsichtighen her Gherald van Greedziil, kerchere to Wyrdum, um dessen bref tho beseghelen, dat ick Gheroldus vorscreven umme bede wyllen orer hebbe wytliken ghehanghen mynen ingheseghel ant spacium desses breves. Int jar unses Heren MoCCCCoLIIIo, altera die Viti martyris.
