| Nummer:oub0673 | Datum:Aurich, 1. April 1454 | Überlieferung:Editie | Fundstelle:Ostfriesisches Urkundenbuch, I, S. 587, nr. 673 |
Häuptling Ulrich von Greetsiel entscheidet einen Streit zwischen Elbe zu Upgant und Folpmer Remedsna wegen der Erbgüter des Friedrich Sickinge zu Gunsten Folpmers.
Wii Olrick to Gretsyl, Norden, [*] Aurike, Emden, Beruna etc., in Oestvreslande hovetlincg, enkennen unde betugen openbare in dessem breve vor allen ersamen vromen luden, de ene zeen, horen offte lesen, dat vor uns gewesen ys Elbe unde syn sone, to Upgante wonachtich, klagende up Folpmer Remedsna, van nagelaten erve unde gudere zaligen Frederikes Sickinge, so dat dozulves de vorben. Folpmer guden besegelden schyn unde tuchwerdigen mans hyrup vor uns gehath hevet, dat Frederick vorben. deme vorben. Folpmer erff gegan was myd synen gude, so[*] dat he eme na lude syner breve unde tuge upgetregen hevet unde gegheven myd willen unde vulborde syner husvrouwen al syn gued, so hee dar hadde, id were replik of unreplik an ewigen tiden to hebbende, to vorzettene, to vorhurende, to vorkopende unde wo eme dat gadelik is unde sinen erven by vort to varende. Welkend des vorben. Frederikes husvrouwe in nakomenden tyden ny[*] hevet byspraked unde ok nenerley klage darumme gedaen, ock hadde zee myd willen ere gued affnomen, alse Frederik Folpmer vorscr. erff ganck. Worumme wy Olrick vorben. sodane gave, vorlatynge unde updreginge vorscr. hebben gesterket, geconfirmeret unde vortgesath, unde Folpmer unde sine erven an ewigen tiden des ergescr. Frederikes nagelatene gudere in besittinge to beholdene off na synen willen darby vort to varende gewiset hebben to brukende sunder yemandes rechte bysprake, hebben ok dozulves ene pene van 60 Rinsche gulden hyrup gesath, uns unde unsen nakomelingen to gevende, welker de Folpmer van desses vorscr. gudes wegene meer anklaget. Hyr yegenwordich anne unde over hebben gewesen de ersamen mester Sibo to Marienhove kerchere, Embo voget to Norden, Frederik Wyerden (?) unde andere vrome Brokman genoch. Desses hebben wy Olrik vorben. to merer kentnisse unse segel witliken hangen heten to dessem breve. Datum anno Domini MoCCCCoLIIIIo, ame stillen markede, [*] to Aurike.
