| Nummer:oub0710 | Datum:13. Jan. 1457 | Überlieferung:Editie | Fundstelle:Ostfriesisches Urkundenbuch, I, S. 619, nr. 710 |
Ubbo Habbena zu Larrelt verkauft dem Kloster Dykhusen 5½ Grase Landes im Dammhuser Hammrich.
Wytlick, kundich unde apenbaer sy alle den ghenen, de dessen breef zeen edder hoeren lezen, woe dat ick Ubbo Habbena, inwoener in Hlerlte, myt mynen vryen unde voerberaeden moede myt wyllen, raet unde vulbord Tuttere, myner echte huusvrouwen, hebbe verkoft rechtverdichges koepes[*] unde vorkope yeghenwordich in craft desses breves deme convente van Dickhuzen sestehalf gras landes, [*] gheleghen ynne Domhuser[*] hammerke, gheheten Twiskeldike, voer ene summe gheldes, der my vul, al unde wal is betaelt den eersten penninck mytten lesten na mynen vullen willen; waerumme soe gheve ick den convent vorghenoemt eren wullen vryen willen, dyt vorscr. lant toe bruken, verkopen, vorwesselen, versetten, alle ere nutticheit unde wyllen daermede tue doende, sunder mynen unde myner huusvrouwen unde unser erven wederroepen, alle ansprake, alle arghelist, hulperede unde nye vunde uthghesproken. Hiir by, mede, an und over hebben ghewesen heer Wyneko, preester in Westerhusen, heer Egbert, prester in Hlerlte. In een oerkunde unde merer tuchnisse der waerheit, zoe hebbe ick Ubbo Habbena vorbenoemt vrentliken ghebeden den eersam heren Sybrande, mynen kerckheren, um synen inghesegel, den he um myner bade willen witlicken ghehangen heten hefft an dat spacium des breves. Na der boert Christi MoCCCCo in deme soven unde viiftichsten yaer, ipso die octava Epiphanie.
