| Nummer:oub0716 | Datum:23. April 1457 | Überlieferung:Editie | Fundstelle:Ostfriesisches Urkundenbuch, I, S. 624, nr. 716 |
Vor dem Pfarrer Gerald zu Wirdum verkauft Ippo Lyudzna daselbst dem Häuptling Aild Beninga zu Grimersum mehrere Grase Landes in longha Toentyuch und Theyengfen.
Ik her Gheraldus, kerchere tho Wyrdum, doen wytlyck ende kundych allen ersamen gueden luden, de dussen breeff zeen edder horen lesen, wo vor mii hefft ghewesen Ippo Lyudzna, myn kerspelsman, ende leyde des ende stunt des bekannt, dat he myt vryen wyllen, vulberaden moede hadde ende hefft vorkofft Ayld Benyngha, hofftlyng tho Grimyssum (unde) Wyrdum, twe grase tillandes, eyn sestendel myn, ghelegen in longha Toentyuch, viiff verdendel, dar Aytet Mannana ende Thyadelt Wyrkesna nast swedde synt, ende in Theyengfeen eyn twed gras, dar Poppe Mannena ende Ippo suster nast swedde syst. Dyt vorscr. lant sal ik Ippo vorscr. Aylde vorscr. vry ende qwyt holden al ansproke vor my ende mynen erffnamen, ende schelde hem dyt vorscr. lant vry ende qwyt, so dat he dat mach vorkopen, vorwesselen, war he wyl, ende syn erven to erven, went he my dyt vorscr. lant vull ende wal betalt hefft vor eyn summe van ghelde, dar my Ippo vorscr wal ane ghenoghet, den ersten pennyng myt den lesten. Darumme so hebbe ik ghebeden mynen kercheren, her Gheralde, over my dussen breff to beseghelen, ende umme tuchnysse dusser vorscr. warheyt ende Ippo vorscr. bede wyllen, so hebbe ik her Gheraldus, cureet tho Wyrdum, myn ingheseghel an dussen breeff ghehanghen. Ghescreven in den jar LVII, up sunte Juryans dach des hylghen ryders.[*]
