| Nummer:oub0719 | Datum:5. Mai 1457 | Überlieferung:Editie | Fundstelle:Ostfriesisches Urkundenbuch, I, S. 626, nr. 719 |
Sibo von Dornum usw. bekundet, dass die Fehde zwischen ihm und der Stadt Groningen und den Umlanden durch den Abt von Selwert und Junker Ulrich als Schiedsrichter und durch die Oberschiedsmänner, dem Bürgermeister Lopow und dem Rathsherrn Gerwer von Hamburg, geschlichtet sei.
Ik Sibo to Dornum, Esenze, Stedestorpe unde Witmunden hovetling bekenne unde tuge openbar an desseme breve vor my unde myne erven, dat ick hebbe belevet, toghestaen unde stede, vast, unvorbroken anghenomen to holdene, zodane zone unde uthsprake, alze de ersamen vromen heren mester Hinrik, abt van Selwert, unde juncher Olrik, to Gretsyl, Norden, Aurike, Emden, Berum etc., in Oestvreslanden hovetling, alze schedesluden, unde de ersamen her Hinrik Lopow, borgermester, unde her Johan Gerwer, radshere der stad van Hamhorch, alze overmannen in der schelinge twischen my unde dem ersamen rade to Groningen hovetlingen, richteren unde der menen ghemeente derzulver stad ummelanden vor datum desses breves vorresen, id zy van schaden, den myn moder to Broke mach leden hebben van Ockinge hues unde erve, unde van unwillen unde schaden, den de van Groningen unde de ere to Oterdum moghen geleden hebben, wo offte in welker wise de mogen wesen vorresen, ghedaen unde an desser naebescreven wise in vrundscoppen uthgesproken hebben; alsoe dat alle de vorscreven schelingk unde twiste an beiden zyden, dal unde nederghelecht schullen wesen to ewighen daghen, de ene up den anderen in genen tokomenden tiden enighe ansprake dar mer up hebben offte doen schullen, men ene ewighe stede vrundlike zone to blivende zunder jenigherleye argelist, dat ik Sibo vorb. dem ersamen rade to Groningen unde den eren myd hande unde myd munde ghelovet hebbe wal to holdene; unde hebbe des to merer kentnisse myn seghel hangen heten to desseme breve. Datum anno Domini MoCCCCoL septimo, am donnersdage negest na inventionis sancte crucis.
