Die Brüder Edo und Hicko, Häuptlinge zu Gödens und Werdum, übertragen den Grafen zu Oldenburg die Friesische Wedde in der Weise, wie früher Sibet von Ostringen und Rüstringen.

Wy Ede unde Hicke, brodere geheten Boginges, to Godense unde Werdum hovetlinghe, enkennet an desseme breve openbar vor allesweme, dat wy endrachtigen myt beradenen mode hebben overgegeven, vorteghen unde vorlaten, geven over, vortyen unde vorlaten vor uns unde unse erven, de nu synt unde werden mogen eweliken unde yummermere aller rechticheit, tosage unde ansproke, de wy an dem Vreschen Wede, id sy de Oster- offte Wester-Wede myt erven, acker, buwet unde anebuwet, holten, heiden, wisschen, weiden, erdbodeme unde mit aller tobehoringe, wo me dat benomen mach, gehat hebben went an de tid, dat desse breff geven unde screven is, geven unde laten de alle na aller wise gave unde overgevynge, alze selige Sibed, hovetlink wandages to Ostringen unde Rustringen, den heren von Oldenboreh de overgaff unde vorsegelde na inneholde unde uthwisinge des breves, in de wald, were unde macht der eddelen unde wolgebornen hern Mauriciuss unde juncheren Gerdes, greven to Oldenborgh unde Delmenhorst, erer erven unde nakomelinghe to ewigen tiden, so dat se myt deme vorben. Wede, mit aller tobehoringe, so vorscreven steit, don unde laten mogen wat se willen sunder unsen ovelenmoet, hinder offte wedersproke unser erven vorb. offte yemandes van unser wegene, geistlik ofte werlik; unde wy Ede unde Hicke, brodere vorben. unde unse erven schullen unde willen sodanne overgevynge, vorlatinge unde vorsekinge des vorscr. Wedes myt den erven, ertbodeme unde myt aller tobehoringe unde gantzer slachtenut grotes unde clenes, nicht utghesproken, truweliken, stede unde vast holden to ewigen tiden. Alle desse vorscr. stucke unde ok alle articule unde puncte des vorg. Sibedes hovetlinges breves stede unde vast to holdene sunder argelist love wy Ede unde Hicke vorb. mit sameder hand unde unser en vor all unde unse erven, boren unde aneboren, in desseme breve in guden truwen unde sweret unde hebben dat samptliken myt upgerichteden vingeren stavedes edes unvorgeven in den hilgen gelovet unde gesworn den ergenanten heren Mauriciuse unde Gerde, eren erven de nu zind unde eren nakomelingen to ewigen tiden, unde hebben des to tuge unde mereren bekantnisse wy Ede unde Hicke vorben, unse rechten ingesegele vor uns unde unse erven vorben. witliken hangen laten to desseme breve. Datum anno Domini millesimo quadringentesimo quinquagesimo septimo, in crastino Thome gloriosi apostoli.

x

x

Bestand	Ostfriesisches Urkundenbuch, I
Fol. Nr.	S. 630
Nr	725
Olim	Orig. im Archive zu Oldenburg.
Jahr	1457
Datumcode	cThome

x

x

Kommentar	Siegel: 1. Ein rechtsaufgerichteter Löwe, wachsend aus einem Berge mit drei Gipfeln, auf deren linken und rechten je ein dreiblättriger Zweig steht. Helmschmuck 2 Zweige. Umschrift: S. Ede Bog.... 2. S. vorige Urkunde. Umschrift: S. Hicko .. Boinges.

x

Material	papier

x

Editionen	E. Friedländer, Ostfriesisches Urkundenbuch I (Emden 1878), nr. 725