Die Häuptlinge Ulrich von Greetsiel usw. und Sibo von Dornum Schliessen mit dem Rathe und der Stadt Bremen ein Bündniss und versprechen, der Stadt gegen etwaige Angreifer zu Hülfe zu kommen.

Wy Olrich, to Gretsyl, Norden, Aurike, Emden, Berum, in Oestvreslande Sibo, to Dornum, Esenze, Stedestorpe unde Witmunde hovetlinghe, enkennen unde betugen opembare an desseme breve vor alsweme, dat wy vor uns unde de unse unde alle der ghennen wegen, de umme unsen willen doen unde lathen willen unde ok mit rechte schullen, umme sunderliker vruntschup, de wy alduslanghe to den van Bremen gehat hebben, uns mit deme ersamen rade unde der stad Bremen vruntliken unde in desser nabescreven wise to hope gesath unde vordreghen hebben. So oft den van Bremen unde den ghennen, de ze in beschermynghe hebben unde vordeghedinghen, jemend overlast unde beschedeginghe dede, dat uns van deme ersamen rade to Bremen witlyk gedaen unde vormyddelst claghe to kennende gheven wurde, willen wy denne unde schullen de upgenante van Bremen tiegen sodanne ere beschedigher vorscriven unde se to rechte beden myt gantsen truwen, unde oft denne desulven ere wedderparte vorbenant sulker unser scrifte unde vorbodes nicht achten oft ziik jeghen de vorscreven van Bremen nicht to rechte geven wolden, schullen wy Olrich unde Sybo myt unser medebescreven unde willen den ersamen rade unde der stad Bremen myt den eren ghunnende wesen, se sodanne ere wedderparte unde beschedigher soken, vorvolghen unde veyden, wor se kunnen unde moghen, sunder unse unde der unsen hinder, unde en willen noch en schullen densulven van Bremen vorben. hiirane nicht entiegen wesen. Desset loven wy Olrich unde Sybo vorscreven vor uns unde de unse unde alle de ghenne, de umme unsen willen doen unde laten willen unde myt rechte schullen, stede, vast, unvorbroken wol to holdene sunder argelist; unde hebben dessen to merer witlicheit unse rechten secrete witliken hanghen hethen vor dessen bref. Gheven na Godes bord veerteynhundert yar, darnae in deme achte unde voftigesten jare, ame daghe Laurencii martiris.

x

x

Bestand	Ostfriesisches Urkundenbuch, I
Fol. Nr.	S. 637
Nr	734
Olim	Orig. im Archive zu Bremen.
Jahr	1458
Datumcode	Lauren

x

x

Kommentar	Siegel: 1. Der bekannte Typus Ulrichs. 2. Rechtsaufgerichteter Bär, als Helmschmuck eine Lilie. S. Sibodi capit. in Dornum.

x

Material	papier

x

Editionen	E. Friedländer, Ostfriesisches Urkundenbuch I (Emden 1878), nr. 734