Die Häuptlinge Tanno Duren, Lubbo Onken und Alko berichten dem Rath der Stadt Bremen über den Erfolg ihrer auf Bremens Wunsch mit Sirk zur Friedeburg wegen seines Streites mit Helmerich von Fikensolt angeknüpften Verhandlungen, lehnen aber persönliches Erscheinen in Bremen wegen der dortigen Unsicherheit für sich ab.

Den erbaren heren borgermeysteren unde radmannen der stad Bremen unsen holdes leven heren denstliken gegeven.
Unsen vrundliken denst myt vermoghe alles guden tovoren, Erbaren leven heren. So alsee gii uns scriftliken hebben ghebeden, hat wii uns in unser egen personen noch eens bii Sirke tor Vredeborch wolden fogen unde myt eme in ganser andacht unde flite also spreken unde vorarbeyden, dat he den unwillen, twyschen eme unde deme duchtygen Helmerike van Fiikensolte[*] wesende, wolde tho lengher tiid bestan laten, wente men in sodaner korten tiid, alse veerteyn daghe na Paschen, in der sake nycht entlikes kan vorramen; des, bysunderen guden vrundes, so hebben wii umme juwer leve van deshalven myt deme genanten Syrke ghewesen to worde unde to sproke, eme sulcke geven to vorstande; darup gaff he uns syne menynghe, he wolde den unwyllen unde twydracht vrundliken overseen unde bestan laten umme unser bede wyllen went veer weken na Paschen, [*] darup so wyl he van stund an in juwer stad senden synen scriver, de yu darup geven scal eynen openen besegelden breff, gheliick he wedderumme begeret van juwer leve, so dat he unde de syne ok vorwaret syn in gudem gheleyde van yu unde den yuwen in deme vorscr. vrundliken bystande, unde denne eynen vrundliken dach tho vorramende unde vorscrivende unde yn Buteyaden to holdende, nomptliken to Blexen uft Eysurden, [*] went he in juwe stad nycht komen kan, darumme he myt juncheren Gerde to unwyllen unde veyde gekomen ys; unde alse de 4 weken na Paschen vorlopen unde vorleden werden, so wyl yd he yu tiide genoch to scriven, uft he des dages bekomen unde holden kan, unde uft gii alse veer weken na Paschen des dages denne ok nycht warden konden, scolen gy eme over tiide genoch scriftliken to wetende geven; unde wes wii dar furder gudes konen vorhandelen unde bearbeyden, darinne don wii myt alleme flite gerne. Ock so gii scriven, gii unser een nomptliken Alke bii yu qweme in yuwe stad gans gerne zegen, des, leven fremdes, van vruchte wegene steyd uns nycht wol to komende in yuwe stad, went alse wii latest bii yuwer leve in yuwer stad (weren), so weren ytlike personen up uns vinende unde wolden uns upghenomen hebben, men uft yuwe ersamheyt in Buteyade wolde komen, dar wyllen wii samptliken uft unser eyn wulmechtych gerne bii ye wesen. Siid Gode to langhen tiiden gesund bevalen. Gescreven under Tannen ingesegele, des wii alle dre hiir samptliken to bruken. Des saterdages na Valentini martyris, anno etc. LX^o.
Tanno Duren to Jever etc.
Lubbo Onnyken to Krypensen, hovetlinghes.
Alko to Inhusen

x

x

Bestand	Ostfriesisches Urkundenbuch, I
Fol. Nr.	S. 650
Nr	754
Olim	Orig. auf Papier im Archive zu Bremen.
Jahr	1460
Datumcode	SpValent

x

x

Material	papier

x

Editionen	E. Friedländer, Ostfriesisches Urkundenbuch I (Emden 1878), nr. 754