| Nummer:oub0762 | Datum:12. Sept. 1460 | Überlieferung:Editie | Fundstelle:Ostfriesisches Urkundenbuch, I, S. 658, nr. 762 |
Tanno Duren, Häuptling zu Jever, erklärt im Beisein mehrerer Geistlicher und Laien, dass er mit Häuptling Sibo zu Dornum usw. übereingekommen sei, ihre Streitigkeiten durch 6 Schiedsrichter am nächsten 21. September zu Aurich schlichten zu lassen.
Ick Tanne Duren, to Jever, Rustring, Ostring und Wangherlandt hovetlinck, enkenne apenbare in desseme breve vor alsweme, de ene zeen uft horen lesen, dat ick in jeghenwardicheit der ersamen heren Bebben, prawest to Husen, heren Alberte to Haghen, heren Dodyken tho Weplensen, [*] kerckheren, unde Wygerdt to Olderssem, Tanno Kanken tho Dornum, Ede Boynghes to Godensen, hovetlinck, unde Eem, vaghet to Norden, my hebbe uppe eyne vruntlike schedinghe leeffliken vorenyghet unde vorsonet in dusser nabescreven wyse myt den ersamen hochgewerden Syben, to Dornum, Esense unde Stesstorpe etc. hovetlinck, unde synen vrunden, so dat wy beyden delen unde eyn itlick bysunderen allen unwillen unde schelinghe, dat twysken uns wente alduslanghe ghewesen heft, scholen unde willen des blyven by soes schedesluden vulmechtich to wesende, uns in rechte uft in vrundtscop des sondaghes na Lamberti[*] erstkamende tho Aurike to vorschedende unde vorlikende; unde wes denne de soes schedeslude yrkennende weerden in rechte uft vruntscop, dem willen unde scolen wii beiden delen gensliken volchaftich wesen. Ock so scolen wy beyden parthen unsse ghelavede ghelt, dat sy van dinghtale uft fanghene inmanen unde hebben, dat bewyslick ys unde unsser en schal deme anderen dar behulpen unde gunstich to syn, syn gheldt to vormanende; unde van nu an went to des sondages na Lamberti schirstkamende moghen des vorbenomeden Syben undersathen unde de syne in mynen landen, ghebede unde havenen wancken, keren unde vorkeren. Alle desse vorscreven stucke rede unde lave ick Tanno hovetlinck vorbenompt vor my unde myne vrunde unvorbrecklicken to holdende. In orkunde der warheyt hebbe ick myn ingesegele drucken heten beneden uppe dat spatium desses. Gegeven in deme vrydaghe na nativitatis Marie, in deme sestigesten jare deme mynre tale.
