Der Bischof von Münster und der Graf von Oldenburg verbünden sich wider den Häuptling Ulrich, weil er sich die Herrschaft in zu Münster gehörigen Landestheilen angemasst habe, und treffen vorläufige Bestimmungen über die ihm abzugewinnenden Gebiete, namentlich Emsigerland, Schloss und Stadt Emden, Reiderland, Oberledingerland und das neu erbaute Schloss Stickhausen.

To wettene, als Oelrich hovetlinck etc. sich weder Got, ere unde recht underwunden hevet unde underwyndet der graeschop Emesgonien off Emesegerlant myt deme slotte unde stade Emeden unde eren tobehoringen unde somigen anderen hoven unde guden, tobehorende deme erwerdigen hogebornen fursten unde heren, hern Johane, bysscope to Munster, phaltzgreven bii Ryne unde hertougen in Beyeren unde syner kerken to Munster, unde ok etzlige syner genaden borgere unde undersaten ungeborligen overvallen unde geschattet hevet, darumb de vurscr, unse genedige here van Munster den ergenanten Oelrich guetligen unde ok myt rechte na lude eyns compromisses tusschen en beeden gegeven unde vorsegelt angelanget unde gefordert hevet, unde Oelrich synen genaden des utgegaen off vorbleven is, unde darto unde baven ok deselve Oelrich sich dagelix wer unde mer stellet unde wrevelt in unde to vorkortnisse unde hinder des vurscr. unses genedigen heren, syner kerken van Munster unde des edelen junckeren Gherdes, greven to Oldenborch unde Delmenhorst, erer beyder unde itliges lande jurisdictien, rechten, herlicheiden, olden gewonten, deynren unde undersaten, ok in avertredinge togesachten off vorsegelden geloven unde fruntschap unde to unvelicheit, hinder unde vordrucknisse der gemeynen straten, coepmans unde besten, unde uphenginge nyger ungewontliger unde ungeborliger tollen, wechgeldes eder drangen, allet in hinder des gemeynen besten unde coepmans, sulcks allen guden fursten unde heren billichen gebort to wederstane. Hiirumb unde to erwervene unde to beholdene erer lande jurisdictien, rechten, herlicheiden unde dat gemeyne beste unde ere deynre, undersaten unde gemeynen koepman velich unde unbeswaret to blyvene, sint de vurscr. unse genedige here van Munster unde juncker Ghert van Oldenborch guetligen overkomen unde eyns geworden, dat de vurscr. juncker van Oldenborch sich hiirumb unde ok umb dat Oelrich solcke lande, darvan he sich hovetlinck nompt, myt unrechte underhevet unde derselven lande undersaten merckligen unde ungeborligen dringet, schattet unde overvallet, tegen den vilgenanten Oelrich zaten, stellen unde enne unde de vurscr. lande unde ere undersaten antasten will, sich der so vele he kan to bekomene, darto unse genedige here van Munster den ergenanten junckeren van Oldenborch gunstich unde vorderlich syn will. Unde worde darumb deselve juncker van Oldenborch van Oelriche merckligen gedrungen unde overvallen, so wil unse genedige here van Munster denselven junckeren van Oldenborch dartegen biistendich unde behulplich siin na syner genaden macht; unde vorseege unse Her Got, dat enige slotte, stede off lande den vurscr. Oelriche affgewunnen off genomen worden, woe dat to queme, der solen unse genedige here vor sich unde syne nakomelinge, bysscope unde kerken to Munster, hebn unde beholden de vurscr. graesschap Emesgonien off Emesegerlandt myt deme slotte unde stede Emeden unde eren tobehoringen unde den hoven unde guden, darumb syne genade alreede na lude des vurscr. compromisses Oelricke angesprocken hevet, unde dartho Rederlandt unde Overledingerlandt; mer de anderen slotte, stede unde lande in Vreeslandt, Oelriche vurscr. also affgewunnen eder affgenomen, solde de ergenante juncker van Oldenborch vor sich unde syne ervene hebn, beholden unde der gebruken;doch deselve slotte, stede unde lande alzdan in leenwar unde vorbuntlicheit te komene unde to syne unsen genedigen heren van Munster unde synen nakomelingen, de van eren genaden to entfangene unde eren genaden getruwe, holt unde vorbuntlich darvan unde mede to syne unde to blyvene. Unde off unsen genedigen heren van Munster unde synen nakomelingen eder den junckeren van Oldenborch unde synen erven vurscr. darin enich hinder off wederstant geschege, des solen se unde ere nakomelinge unde ervene malckanderen biistendich unde behulplich siin, darin vurgeschrevenen maten stantafftich to beholdene sunder argelist. Ghescheege ok enich wederstant in erkriiginge unde wynnynge der slotte, stede unde lande vurscr. off er enich besunderen, des solen unse genedige here unde juncker van Oldenborch bii malckanderen bliiven unde biistendich unde behulplich malck dem anderen to syne hent de ingeworven unde gewonnen sint. Werd ok enich der slotte, stede, lande unde gudere vurscr., de unsen genedigen heren unde junckeren unde eren nakomelingen unde erven erer enich best deynde off gelegen weren dan den anderen, des solden se malckanderen butenschap off eyn redelich darumb doen, unde dat dan den gennen laten, deme dat also best deynde off gelegen were, unde als dit alles, so vurscr. is, so queme, des dan to beyden syden erffverbrevinge unde vorsegelinge te makene, darmede unse genedige here syne nakomelinge, kerke unde gestichte van Munster unde juncker Ghert van Oldenborch unde syne ervene vurscr. to beyden syden vorwart sin. Worde ok van en off erer welckem dat slott off vestnisse to Stickhusen, dat Oelrich also to hinder unde besweernisse des gemeynen copmans unde besten upgeslagen eder gevestet hevet, gewunnen unde bekrefftiget, solen unse genedige here unde juncker van Oldenborch vurscr. van stunt sunder indracht alinck brecken unde vorsturen. Alle unde itlike puncte unde articule vurscr. sint de vurscr. unse genedige here van Munster unde juncker van Oldenborch umb dranges, last unde reden vurscr. unde erer beyder landen unde des gemeynen besten unde copmans willen myt malkanderen overkomen unde erer eyn deme anderen, gelovet hevet stede unde vast to holdene, unde des bii malckanderen to bliivene tot eynde der sake sunder indracht unde argelist. Unde des to tuge sint deser nottulen twe allens ludende myt unses genedigen heren unde junckeren van Oldenborch vurscr. segelen hiir unden upgedruckt vorsegelt, der se malck eyne hebn. Gededinget unde gegeven tor Cloppenborch, in deme jare unses Heren dusent veerhundert eyn unde sestich, des nesten donredages na sunte Johannes dage nativitatis to myddensomer.

x

x

Bestand	Ostfriesisches Urkundenbuch, I
Fol. Nr.	S. 665
Nr	770
Olim	Orig. im Archive zu Oldenburg.
Jahr	1461
Datumcode	JpNatJoh

x

x

Kommentar	Von den aufgedrückten Siegeln ist nur das Eine, auch dieses unkenntlich, erhalten.

x

Material	papier

x

Editionen	E. Friedländer, Ostfriesisches Urkundenbuch I (Emden 1878), nr. 770