| Nummer:oub0774 | Datum:22. Nov. 1461 | Überlieferung:Editie | Fundstelle:Ostfriesisches Urkundenbuch, I, S. 671, nr. 774 |
Testament des Häuptlings Wiard zu Uphusen und Oldersum, in welchem er, bei Gelegenheit der Uebertragung von Grundstücken und der Burg zu Midlum an Frau Theda, alle seine Klagen über die ihm von deren Vorfahren Focko und Uko angethanen Gewaltthätigkeiten aufführt.
In nomine Domini. Amen. Anno nativitatis eiusdem millesimo quadringentesimo sexagesimo prima, ipso die Ceciliae virginis et martyris, hebbe ick Wyartt tho Uphusen, hovetlinck tho Oldersum, want[*] ick was kranck van lichame, nochtans was ick redelick und wetende miner sinnen, gemakett und gesettet myn testament, myne rekenschup mit vulbort myner kinderen und aller miner ervent in deser nabeschreven wise. Int erste, so hebbe ick gegeven und bevalen sunte Antonio und sunte Simeoni tho Oldersum tho einer ewigen vicarie all dat erve, dat ick tho der Bonenborgh und in Hatsemer hammerke liggende hebbe, alse mine olderen datt angeervet hebben, und dartho twe iseren koe bi der vicarie tho bliven, und myne erven scholen dartho bouwen ein hues tho de preesters behoeff. Item den kerckhern tho Oldersum twe koen up dat lehen, und myne erven scholen dat kerckherenhues mit stene decken. Item up de vicarie sunte Nicolaus twe iseren koe. Item Ilre moniken sollen hebben dat lant tho der Middelstenborch bi Monikenborgen, dat licht binnen slotes. Item Ochtelburen hilligen scholen hebben ein paar ossen, Item Simonswoltmer hilligen 1 paar ossen. Item sunte Maria Magdalena in Alingewolda[*] ein paar ossen, 4000 muerstenes tho hulpe den klockthorne, und so vele dackstenes, dat de gedecket werde. Item s. Margriete tho der capellen tho Monikeborgen so vele muerstenes und dackstenes, so se behoven tho der capellen mit den olden steine. Item Phaller brodern scholen hebben de huire van lutke Valler werven twe yar lang. Item den susteren tho Reide und tho Thedingum malck eine koe. Item Oldersumer hilligen twe koen. Item sunte Nicolaus tho Wirdermunken ein dusent stenes. Item so sollen myne erven mester Clemens betalen dat achterstallige gelt van den orgeln. Item so sollen myne erven vor my und saligen Essen einen pelegrimen sennen tho Rome. Item so bekenne ick Wyart vorgescr., dat ick Hayen thor Papenborch deger und all hebbe betalet dat erve, dat ick em affkofte in Jemmiger hammerke. Item hebbe ick gekofft Ailt Sinedes herdt van Johanne thor Mude voer achte stige Arentgulden. Ock so bekenne ick Wyart vorgescr., dat ick mynen leven oem junckher Olrike hebbe gegeven negen stige Rynsche gulden voer sinen andeel des erves, dat wi thosamende wunnen hebben van saligen Kancken Gelen soene tho Petkum und hebbe dat sulvige erve ock geloset van den erffnamen, alse van junge Eerde tho Thoernum und sinen kinderen. Ock so hebbe ick Hymben Ennen tho Emeden und Uken ehren soene datt erve deger all unde woll betalet, dat ick van em gekofft hebbe. Item so hebbe ick Campen thon Eendorpe de werve tho lutke Vallern, de syn weren, affgekofft und woll betalet. Item so bekenne ick, dat Gerdt tho Petkum gehen recht en hefft tho den 4 grese landes, daer he up spreckt, belegen tusken den dyke und Widdelswer, wente my dat angeervet is van olderen tho olderen. Ock so bekenne ick, dat ick noch myne vorolderen nicht dencken noch gehoret en hebben, dat Borsum, Jersum, Widdelswer thenden hebben gegeven thor provestye tho Emeden. Item so hebben de ersamen und mynen leven oeme Enno tho Greetzyl, Edsert syn soene saliger dechtnisse, in vortyden up den slate darsulves tusken my und myne erffnamen eine stede vaste ewige fruntschup gemaket van allen unwillen und twidracht, de gewesen is tusken Imelen tho Grimersum hovetlinck, Folkmer und Aylt sine soenes, de dar jegenwordig wehren, und dat de mede leveden nummermehr bett an tho klagen van wegen der sake. Item so is myn begeher und vullenkamen wille, dat de ersame frouwe Thede an sick holden solde und tho ewigen tiden bruke de borch tho Middelum, und de werve darsulves, und dat erve in Middelumer hammerke, Eppingeweher hammerke, alse my dat dartho behoeret, voer dat erve, dat ick van eer gebruke tho Oldersum und nehme dat up mine sele, dat se dar dan vull voer hefft, mit alsulcken dreppelicken grote schaden my eere olderen, also Focko und Uko syn sone seliger dechtnisse, hebben gedaen, also hyrna bescreven is. Int erste, so nam my Focko Ukes ein gulden span, ein paar aringe, einen gulden gordel, ein paar guldene oerbagen, ein loeff goldes und geschmide, als einer frouwen tho dregen boret, dat my selige Adde Wyersna thor Bonenborch angeervet hadde. Item do Focko und juncker Ocko guder dechtnisse mit malckander orlegeden, do brachte my salige Uko, Focken soene, twehundert manne tho Uphusen aver mynen willen, und do lavede my desulve Uko mit hande und mit munde by salicheit siner selen, he und sin vader wulden desse vorgescreven twehundert knechte buten mynen schaden Ionen und spisen, und lavede my, dat he und sin vader mit alle sinen frunden my wulde schadeloes holden, de daer van kamen muchte; des nicht geschehen is. Item so hebbe ick desse twehundert knechten ein yar up myner kost gehatt und daer hebbe ick voer uthgegeven.[*] Item koffte ick tho Oyte negen stige tunne roggen, ittlike tunne voir veher golden Arnsgulden. Item koffte ick hundert tunne botter, de gult einsdeels 16 gulden, eindeels 18 gulden, und eindeels 20 Arensgulden, daer ick myn erve eindeels umme verkofft hebbe. Item koffte ick 400 (tunnen) innenbrouwen beers und darenbaven, dat ick sulven brouwen leet. Item tho Appingewehr ein par ossen voer 18 Rinsche gulden, und tho alle desse vorgescr. unkosten hebben se nehne hulpe gedaen, also se my gelavet hadden. Item so benam desulve Uko my und saligen Essen van der borch tho Borsum veer stige dusent muerstenes. Item so muste ick Focken geven hundert Rinsche gulden, de he dem bisschup van Munster gaff. Und belevet und behaget der voergescr. frouwe Theden desses vorgescr. erves wessel, so scholen alle dese vorgescr. ansprake dale gelecht wesen, und eine ewige fruntschup sunder weddersprekent. Item bekenne ick Wyardt, dat ick eine alinge soene und fruntschup hebbe gemaket mit Brunger tho Loquarde umme allen schaden, den unse vorolderen thosamende gehadt hebben. Int ehrste, do ridder Ocko seliger gedechtnisse orlegede mit Hisseken, pravest tho Emeden, do begeerde Ocko vorgescr. hulpe und bistandt van Haer Aylsna, de dessulven Ocken suster hadde, und in dersulven tydt wert myn oldevader Haer Ocken affgevangen und wordt an den staken tho Emeden gedodet. Item hyrnu. hefft salige junckher Kene ock georleget mit Hisseken, dem praveste, und do muste Kene vorgescr. myn vader und broder, den Godt genade, bi dwange ock helpen up Hisseken vorgescr., und do quemen de hensestede Hisseken tho hulpe, und do sonede junckher Kene mit Hisseken buten mynes vaders und broders weten und hulpe unse slot und timmeringe tho Valleren vornichtigen, und he benam uns do all dat reppelike guedt, dat daer du up was. Item darna do benam desulve Keno mynen broder Aylde dat slot tho Osterhusen und all dat golt, sulver und geschmyde, dat my und mynen saligen broder mede tho behoerede; und up desulve tydt, do hefft junckher Kene minen broder Aylde und myner moder sustersone Aylde gevangen, und Kene de lavede dessen twen vorgescr. Aylden guden truwen vasten geloven voer lyff und gesunt, vor ewich sitten und nicht tho vorderven sunder jenigerleye geveherde. Hyraver sint desse twe vorgescr. Aylde tho Aurike gestocket und daer hemelycken und yammerlycken van den live gebracht. Item so hefft uns desulve Kene genamen in Moerhuser hammerke veer stige demede landes, de myner olde moder tho bolburge[*] gegeven wehren. Voer alle desse ansprake und schaden, als hyr vorgescr. steit, hefft my desulve Brunger vorgescr. in fruntschuppen mit vullen voerbedachten willen gegeven und avergedragen alle dat erve, dat em Kenessen angeervet hadden twisschen Valleren und Oldersum, und den herdt in den Ripen, dat he my bevestet hefft und mynen erffgenamen an einen breve, den he mit sines sulves segell besegelet hefft, darbi hangen heer Folrikes und heer Diuden ingesegele tho Risum und tho Loquerdt kerckherrn. Item so hebbe ick Wyerdt vorgeschreven voertgesatt und vullbordet, dat de breeff, den ick myner huisfrouwen Tetten gegeven hebbe, inholdens up dat erve in Risumer hammerke, den mynen leven oemen junckher Oldrick und junckher Sibo besegelet hebben, standtafftich und unvorbraken bliven schall tho ehren besten. Ock baven all so bidde ick hoechlicken und fruntlicken den ersamen junckheren Olrike tho Greetzyl etc. und Sibo tho Esense, dat se umme Gades willen und umme de weldaet, ick bi em und eren leven frunden bewiset und alle tydt gehrne gedaen hebbe, dat se na voertan willen miner kinderen beste doen, und sette und stedige de tho vormundere mit Snelligers hulpe miner huisfrouwen Tetten, Wyerdt und Elborgen ehre kindere; hyr yuwe erbarheit sick an tho bewisen mit den besten, alse ick yu und nehmant anders yuwe erbarheit tho betruwe und dar gehrne up gestorven bin. Und do ick Wyardt vorg. gesunt aller miner sinnen dit vorgescr. testament gesatte und makede in jegenwordicheit des hilligen sacramentes, dar weren bi an und aver heer Frerick, canonicus tho Langen, und Wolter, kerckher tho Oldersum, heer Enne, kerckheer tho Rarchum, Udo Lubbinghe und Imele, hilligemans tho Oldersum, und voert de allinge buer darsulves. In orkunde dessen, so hebben wi heer Frerick, heer Wolter und heer Enne kerckheren vorg. umme bede willen des ersamen Wyardes vorgescr. unse ingesegele beneden an dit testament gehangen in den yare und dage, alse vorgescreven is.[*]
