| Nummer:oub0780 | Datum:14. April 1462 | Überlieferung:Editie | Fundstelle:Ostfriesisches Urkundenbuch, I, S. 678, nr. 780 |
Die Kirchvögte zu Pilsum tauschen mit Einwilligung ihres Pfarrers und der dortigen Bauern mit dem Kloster Langen 2 Grase Landes im Hamswehrumer Hammrich, das Tatekenland, gegen zwei andere, ebenda gelegene, Namens Westerhoeck, aus.
Wy Frederick Habbena, Tyard Eppana unde Enno Benena, kerckvogheden to Pilsum, bekennen unde betughen in der waerheit voer allesweme, wo dat wy, mit onsen vrien willen unde voerberadenen moede mit willen, raet unde vulboert here Syardes unses kercheren unde de mene boeren, hebben overghegheven unde opghedraghen, gheven over unde updraghe yeghenwoerdich in cracht desses breves deme convente tho Langhen twe grase landes, gheleghen in Hamswere hamric, gheheten Tateken lant, in een lant van drien graesen, voer wele twe grase hebben wy weder ontfangen van onser hillighen weghen van deme convent voerscr. twe grase gheleghen in deselve hamrick voerbenant, ghenamet Westerhoeck, to ene stede vaste rechtverdighe ewighe wessele, daer ons to beyden syden vul ende al wael ghenoeghet na unsen willen, waeromme scal unde mach dat convent voerbenant desse twe grase voerscr. bruken, vercopen, verwesselen, alle eren willen unde nutticheit daermede to doende sonder onsen unde onsen naecoemelinghen wederroepen unde alle ansprake gheestelikes unde weerlikes rechtes; alle arghelist unde hulperede, nye vonde uutghesproken. In orkunde der waerheit so hebben wy kerckvogheden voerbenant vruntliken ghebeden heren Syard unsen keercheer voerbenant, umme syne ingheseghel, de he witliken unde mit gueden willen heeft hanghen heten to dessen breve. Na der bord Cristi MoCCCCo unde LXIIo, up sunte Tyburcius dach martiris.
