| Nummer:oub0782 | Datum:8. Juli 1462 | Überlieferung:Editie | Fundstelle:Ostfriesisches Urkundenbuch, I, S. 680, nr. 782 |
Bürgermeister und Rath von Bremen vermitteln als Schiedsrichter in den Streitigkeiten zwischen den vornehmsten Ostfriesischen Häuptlingen und den Grafen von Oldenburg die Unterhandlungen mit den Ostfriesischen Bevollmächtigten Edo von Gödens und Alko von Inhausen, und verabreden mit ihnen eine künftige Tagfahrt.
Wy borgermeistere unde raedmanne der stad Bremen bekennen unde betugen opembare in desseme serter vor allesweme, so alz de erbaren vromen unde ersamen hovetlude juncher Olrik to Gretsyl, Norden etc., Sibo to Dornum, Esenze, Lubbe Onneke to Knipensen, Tanne Duren to Jever, in Ostringe, unde Sirik tor Vredeborch, hovetlinge, de ersamen Eden Boynges to Godense unde Alken to Inhusen vulmechtich van erer aller weghene dorch sodannes werves willen, dar uns van beyden parten macht ane licht, unde ok umme unwillen twischen deme edelen unde wolghebornen heren, heren Mauricio, greven to Oldenborch unde Delmenhorst up de enen, unde den erbaren junchern Olrike, Siben, Lubben, Tannen, Sirike unde Alken up de anderen side wesende, in unse stad Bremen hadden ghesant, dar wy nu alze gude middelers[*] twischen den beyden parten nae ereme tholathe unde beleve van beyden siiden hebben yntlike vorramet, degedinget unde ghesloten, so dat de erbenanten vulmechtigen Ede unde Alke denne van stund, wan se to hues sind ghekomen, by den erben. hovetlingen allen desset so vorarbeyden willen, dat se syk unghesumet mit der macht scholen leggen vor de Nigenborch;[*] unde oft en God hulpe, dat se de Nigenborch wunnen, de scholen se scliten unde daele breken, so dat se nemande to schaden en stae, unde ok dat steenhues, nicht veerne van Bokhorn belegen, desgelykes daele scliten, unde dat en schal Eden Boynges in siner oerbeyde van heren Mauricio nicht vorkeret werden mit nenerleyge thosaghe, wes he jeghen juncheren Gerde darane deyt; unde her Mauricius schal vastlyken bestellen mit der stad van Oldenborch unde der herschup, dat se schole dar stille to sitten, so dat se den vorscreven hovetlingen edder den eren nerghen mede entieghen syn, unde juncheren Gerde mit siner macht dorch ere stad nicht riden lathen up der vorscreven hovetlinge argeste. Unde denne en willen noch en schollen de hovetlinge erben. unde de ere syk an de van Oldenborch unde herschup noch an eren guderen nene wiis vorfangen, sunder uthghesproken juncheren Gerdes sclote, de in deme Amerlande[*] liggen unde ere opembare viande sind, den willen de hovetlingen viantlyken doen, so lange dat sodanne sclote in her Mauricius hande komen. Voghede syk desset ok also, dat se de sclote wunnen, dat scholde wesen mit her Mauricius willen in desser nascreven wise, so dat de hovetlinge erben. unde ere hulpere scholden syk denne richten na den knechten unde gude, wat se daran vorwerven konden, unde de sclote scholden bliven in her Mauricius handen unde macht sunder arghelist. Vortmeer scholen unde willen de vorscreven hovetlingen een bolwerk maken, oft se dat van unledicheit to bringen konden, tho Vaerle up den weel tho bathe den landen unde deme ghemenen koepmanne, nene vithalie van buthen up to bringende, unde de hovetlingen willen juncheren Gerde und, sine (vrunde) vor ere vyande holden, so lange dat her Mauricius unde de vorscreven alle samtlyken des to enen guden ende sind ghekomen, unde wanneer her Mauricius erben. Vaerle in sinen handen heft, so schal men dat bolwerk breken, yd en blive denne mit her Mauricius willen bestande. Vortmeer umme allen twidracht unde unwillen, de verresen in twischen heren Mauricium unde den vorscreven hovetlingen, id sy luttick ofte grod, wat id sy, nicht uthesproken, dar wille se ere vrund van beydentsyden up legheliker stede na lude erer vorbuntbreve to kesen, dartho denne wy erben. raed tho Bremen na beyder parte willekore en overman tho wesen unde de beyden parte jo in vrunschuppe ofte in rechte vorscheden scholen, also vro wy alle myt der hulpe Godes unnsen eende mit juncheren Gerde vorworven hebben, unde darnae mit den ersten wy konnen schal de dachstede vorramet werden. Hyrup scholen unde mogen der beyder parte koepmane unde undersathen bynnen desser tiid under malkanderen en islyk in des anderen ghebede velich unde vredesam mit eren liven unde guderen kamen unde varen, keren unde meren sunder jenigherleyde behael, vare, lettinge, noch overfael van beyden parten. Unde desser breve sind twe van eneme ghelude, de ene dorch M N O P Q uth deme anderen ghesneden, des her Mauricius den enen to siner unde Ede Boynges unde Alke den anderen tho der aller hovetlinge behoef hebben beholden. Nae Godes bort veerteynhundert yar, darnae in deme, twe unde sestigesten jare, ame dage Kiliani episcopi ac martiris.
